“Şamaxı”nın qapıçısı Kamal Bayramovun futbolinfo.az saytına müsahibəsi
– Millinin oyunları ilə əlaqədar çempionatda yaranmış fasilədən necə yararlandınız? Bu fasilə “Şamaxı”ya xeyir verəcək?
– Çalışdıq ki, milli fasilədən lazımınca yararlanaq. İnşallah, bizə faydalı olar. Heyətimiz məhduddur və ardıcıl oyunlar zamanı zədəli futbolçuların olması çətinlik yaradır. Fasilə zədəlilərin bərpasına kömək etdi. Fiziki, texniki və taktiki məşqlər keçdik.
– Fasilədən sonra çempionatdakı ilk oyununuz səfərdə “Sumqayıt”a qarşı olacaq. Bu görüşdən gözləntiniz nədir?
– Bizim üçün önəmli matçdır. Rəqibin geniş heyəti və individual baxımdan güclü futbolçuları var. Sumqayıt səfəri həmişə çətin keçir, çünki rəqib yaxşı azarkeş dəstəyinə malikdir. Buna baxmayaraq, səfərdən əliboş qayıtmaq niyyətimiz yoxdur.
– “Şamaxı”nın bunaqədərki çıxışını necə dəyərləndirirsiniz? 12 oyuna 13 xal toplamısınız və hazırda 7-ci yerdəsiniz. Daha çox xal toplamaq olardı?
– Yeni komandayıq, işlər çoxdur, çalışmalıyıq. Çətinliklərin olması normal haldır. İnkişaf etmək istəyiriksə, bu yoldan keçməliyik. Fikrimcə, bu günə qədər normal çıxış etmişik. Turnir cədvəlində daha da yaxşı yerdə ola bilərdik. Amma yeni qurulan komanda olduğumuzu təkrarlamalıyam. Belə komandalarda istər-istəməz bəzi çatışmazlıqlar olur. İnanıram ki, zamanla daha da güclənəcəyik.
– “Şamaxı”nın təcrübəli futbolçularından birisiniz. Komandadaxili ab-hava, yerli futbolçularla legionerlər arasında münasibət necədir?
– O yöndə problemimiz yoxdur. Bir ailə kimiyik. Hərə öz üzərinə düşəni edir. Birlik, bərabərlik bizim üçün önəmlidir.
– Çempionatda mövsümün qalan hissəsi üçün əsas hədəfiniz nədir: hazırkı mövqeyinizi qorumaq, yoxsa turnir cədvəlində bir qədər yuxarı qalxmaq?
– İlk növbədə hədəfimiz komandanı yüksək liqada saxlamaqdır. Turnir cədvəlində yuxarı qalxmaq şansımız olsa, bundan maksimum istifadə edəcəyik. Yekun nəticənin bizim üçün xeyirli olmasını istəyirik.
– Ölkə Kubokunda da mübarizəni davam etdirirsiniz və turnirin 1/8 finalında “Zirə” ilə qarşılaşacaqsınız. “Şamaxı”nın növbəti mərhələyə adlamaq şansı nə qədərdir?
– Çətin rəqiblə üz-üzə gələcəyik. Amma kubok oyunları fərqli ab-havada olur. Şansımızı yoxlayacağıq.
ABBAS
