Ermənistanın baş naziri Nikol Paşinyan bildirib ki, ilin sonuna qədər Azərbaycanla sülh sazişinin imzalanması üçün əlindən gələni edəcək. O, bu barədə Ermənistanın İctimai Televiziyasına müsahibəsində bildirib.
“TASS” Paşinyandan sitat gətirib: “Öz tərəfimdən sazişin ilin sonuna qədər imzalanması üçün hər şeyi 100% və hətta daha çox etməyə hazıram”.
O qeyd edib ki, danışıqlar prosesində müəyyən müsbət irəliləyişlər var. Baş nazir qeyd edib ki, beləliklə, Ermənistan saziş bağladıqdan sonra qarşılıqlı prinsip əsasında Azərbaycana qarşı beynəlxalq iddialardan əl çəkməyə hazırdır.
Bundan əlavə, İrəvan Bakıya təklif edib ki, Avropa İttifaqının mülki missiyası sərhədin delimitasiyası edilmiş hissələrində fəaliyyət göstərməyəcək.
Paşinyan belə nəticəyə gəlib ki, Ermənistan və Azərbaycan cəmiyyətləri sovet sərhədləri daxilində olan ölkələri tanımalı və bir-birlərini rahat qoymalıdırlar.
“Sonra yavaş-yavaş kommunikasiyalar açmaqla, iqtisadi əlaqələr yaratmaqla əlaqələri diqqətlə inkişaf etdirməyə başlayaq, əminəm ki, o zaman bu əlaqələr çox sürətlə inkişaf edəcək,”-o əlavə edib.
Azərbaycan və Ermənistan bu ilin dekabrında sülh müqaviləsinin mətninin müzakirəsinə qayıdacaqlar. İrəvan Bakını 16 maddədən ibarət sülh sazişi imzalamağa dəvət etdi. Paşinyanın sözlərinə görə, heç olmasa bu razılaşdırılmış maddələri imzalamaq lazımdır, çünki iki ölkə arasında münasibətlərin bütün problemlərini bir sənədlə həll etmək mümkün deyil.
Azərbaycan prezidenti İlham Əliyev vurğulayıb ki, sülh müqaviləsinin imzalanması hər şey razılaşdırıldıqdan sonra baş verəcək.
Almaz Həsənli
