Keçmiş CHP başqanı Kemal Kılıçdaroğlu Tunceli və Ovacık bələdiyyələrinə qəyyum təyin edilməsinə sosial media hesabından sərt reaksiya göstərib.
Musavat.com-un xəbərinə görə, Kılıçdaroğlu paylaşımında qeyd edib:
“Dünən də, bu gün də, sabah da xalqın iradəsini ələ keçirən qəyyumlardan yanayıq! Tək adam rejimi səbəbdir, qəyyumlar isə nəticədir! Əvvəlki qayyumlar kimi, bu gün də Tunceli və Ovacık bələdiyyələrinə təyin edilən qəyyumları tarixə göməcəyik! Sıraları sıxlaşdıraq, dostlar! Mübarizə apararaq həm tək adam rejimindən, həm də qəyyumlardan xilas olacağıq”.
Məlumata görə, dünən Tunceli 1-ci Ağır Cinayətlər Məhkəməsi “PKK/KCK silahlı terror təşkilatına üzv olmaq” ittihamı ilə Tunceli bələdiyyə başqanı Cevdet Konak və Ovacık bələdiyyə başqanı Mustafa Sarıgülə 6 il 3 ay həbs cəzası verib. Həbs qərarından bir gün sonra Türkiyə Daxili İşlər Nazirliyi Cevdet Konak və Mustafa Sarıgülün yerinə qəyyum təyin edildiyini açıqlayıb.
Nazirlikdən verilən məlumata əsasən, Cevdet Konakın yerinə Tuncelinin valisi Bülent Tekbıyıkoğlu, Mustafa Sarıgülün yerinə isə Hüseyn Şamil Sözen qəyyum təyin edilib.
Kemal Kılıçdaroğlu isə qayyumlara qarşı mövqeyini kəskin şəkildə ifadə edib.
Musavat.com
