ABŞ qoşunlarının 2021-ci ildə Əfqanıstandan çıxarılmasına rəhbərlik etməyə kömək edən general-leytenantın rütbəsinin yüksəldilməsi Oklahoma ştatından respublikaçı senator Markueyn Mallin tərəfindən dayandırılıb.
Bu barədə üç mənbəyə istinadən CBS News xəbər verir.
General-leytenant Kristofer Donahu general-polkovnik rütbəsi almalı və ABŞ Ordusunun Avropaya komandanlığına rəhbərlik etməli idi.
Bununla belə, Pentaqonun tövsiyəsinə baxmayaraq, onun adı bu həftə rütbəsinin yüksəldilməsi ilə bağlı Senatın Silahlı Qüvvələr Komitəsindən keçən siyahıda olmayıb.
Vəziyyətlə tanış olan iki mənbənin “CBS News”a verdiyi məlumata görə, bu addım generalın Əfqanıstandan qoşunların çıxarılmasında iştirak etdiyi üçün nəzərə alınıb. ABŞ-nin yeni seçilən prezidenti Donald Tramp dəfələrlə bəyan edib ki, ölkənin hazırkı rəhbərliyi qoşunların Əfqanıstandan xaotik şəkildə çıxarılmasına görə heç bir generalı cəzalandırmayıb.
Qeyd edək ki, ABŞ Ordusunun XVIII Hava Desant Korpusunun komandanı, general-leytenant Kristofer Donahu Almaniyanın Visbaden şəhərindəki bazada Ukrayna Silahlı Qüvvələrinin NATO təlimatçılarına rəhbərlik edib.
O, Şərqi Avropa, Yaxın Şərq, Cənub-Qərbi Asiya və Afrikada əməliyyatlar planlaşdırıb və bu əməliyyatlarda iştirak edib. Bunlara “Əbədi Azadlıq Əməliyyatı” (Əfqanıstan), “İraqın Azadlıq” əməliyyatı (İraq), “Yeni Şəfəq” əməliyyatı (İraq), “Azadlıq gözətçisi” əməliyyatı (Əfqanıstan) və “Qətiyyət” əməliyyatı (İraq və Suriya) daxildir.
