200-ə yaxın çürümüş cəsədin tapıldığı ABŞ-nin Kolorado ştatında cənazə evinin evli ortaq sahibləri cəsədlərdən sui-istifadədə təqsirli biliniblər.
“Cebheinfo.az” bu barədə “ABC News”-a istinadən xəbər verir.
Con və Keri Hallford Kolorado Springs bölgəsində və Penrose, Koloradoda fəaliyyət göstərən “Təbiətə Qayıdış” Cənazə Evini idarə ediblər. 2023-cü ilin oktyabrında Fremont qraflığının şerif ofisi sakinlərin obyektdən gələn xoşagəlməz qoxu ilə bağlı məlumatlarını araşdırıb və cəsədlər tapılıb.
Rəsmilər tapılan cəsədlərdən bəzilərinin 2019-cu ildə ölənlərə məxsus olduğun söyləyiblər.
İşi aparan 4-cü Ədliyyə Dairəsinin prokuroru Maykl Allen bildirib ki, biznes sahibləri cəsədlərdən sui-istifadədə günahkar biliniblər.
Rayon prokuroru Keri Hallfordu 15 ildən 20 ilə qədər, Con Hallfordu isə 20 ilə qədər həbs cəzası gözlədiyini deyib. Hökm 2025-ci il aprelin 18-nə təyin edilib.
Cəsədlər aşkar edildikdən sonra müstəntiqlər cütlüyün yaxınlarının dəfn olunacağına və ya yandırılacağına inanan müştəriləri aldatdıqları sxemi aşkar ediblər.
Cütlük dəfn xidmətlərinə görə ödəniş qəbul etdiklərini, lakin sonradan heç vaxt yerinə yetirmədiklərini etiraf ediblər. Məhkəmə sənədlərinə görə, ölən şəxslərin külü yerinə qablarda quru beton qarışığı təqdim edilib.
Məhkəmə sənədləri göstərir ki, cütlük dörd ildən çox müddət ərzində heç vaxt yerinə yetirmədikləri kremasiya və ya dəfn xidmətləri üçün zərərçəkənlərdən 130000 dollardan çox pul yığdıqlarını etiraf ediblər.
Məhkəmə sənədlərinə əsasən, onlar ABŞ-nin Kiçik Biznes Administrasiyasını COVID-19-dan zərərçəkənlər üçün yardım fondlarından 800 000 dollardan çox pulu aldatmaq yolu ilə əldə etdiklərini də etiraf ediblər.
