Yeni doğulan körpələrin immun sistemi tam inkişaf etmədiyi üçün onlar infeksiyalara qarşı həssasdırlar. İlk üç ay ərzində körpələrin immun sistemi böyüklərlə müqayisədə daha az sayda infeksiyayla mübarizə aparan hüceyrə ehtiva edir. Bu da böyüklərdə yüngül simptomlara səbəb olan infeksiyaların körpələrdə həyati təhlükə yarada biləcəyi mənasına gəlir.
BAKU.WS xəbər verir ki, Böyük Britaniyada fəaliyyət göstərən Dr. Karan Raj TikTok-da paylaşdığı bir video ilə körpələri öpməyin təhlükələrinə diqqət çəkib. Bu paylaşım sosial mediada minlərlə insan tərəfindən müzakirə edilib və bir çoxunun bu mövzuda məlumatsız olduğunu göstərib.
Böyük Britaniyada yerləşən Lullaby Trust təşkilatının keçən il apardığı bir sorğuya görə, yeni valideynlərin 54%-i, infeksiya risklərini bilmədən, dostlarının və ailə üzvlərinin körpələrini öpməsinə icazə verib.
Körpələrin immun sistemi zəifdir
Məsələn, herpes virusu böyüklərdə sadəcə dodaq uçuqlarına səbəb olduğu halda körpələrdə ciddi xəstəliklər yarada bilər. Virus yalnız körpənin gözlərini, ağzını və ya dərisini təsirləndirirsə, antiviral müalicə ilə sağalma mümkündür. Ancaq infeksiya sistemli hala gəlib orqanlara yayılarsa, ölümcül ola bilər. Xüsusilə həyatın ilk dörd həftəsində körpələr herpes virusuna qarşı olduqca müdafiəsizdirlər.
Bundan əlavə, körpələr qrup B streptokok (GBS) kimi hüceyrədaxili bakteriyalara qarşı da həssasdırlar. GBS böyüklərin həzm və ya cinsiyyət yollarında zərərsiz şəkildə mövcud ola bilər, lakin körpələrdə sepsis, sətəlcəm və menengit kimi ciddi xəstəliklərə səbəb ola bilər. Eynilə, böyüklər üçün zərərsiz olan bəzi E. coli növləri körpələrdə ciddi infeksiyalara yol aça bilər.
Körpələrə sevgi göstərmək üçün təhlükəsiz yollar
Yeni doğulmuş körpənin valideynləri qonaqları öpmə və toxunma mövzusunda xəbərdar etməkdən çəkinməməlidir. Körpənin sağlamlığını düşünən bir ziyarətçi bu cür tələblərə anlayışla yanaşmalıdır.
Əgər körpəni öpmək istəyirsinizsə, infeksiya riskini minimuma endirmək üçün bu tövsiyələrə əməl edə bilərsiniz:
Əllərinizi mütləq yaxşıca yuyun
Körpənin üzünü və ya ağzını öpməkdən çəkinin, bunun yerinə ayaqlarını və ya başının arxa hissəsini öpə bilərsiniz.
Aktiv bir infeksiyanız varsa, körpəni ziyarət etməkdən imtina edin. Xüsusilə körpə bir aydan kiçikdirsə, bu çox vacibdir. Soyuqdəymə kimi tənəffüs yolu infeksiyalarınız varsa, yaxınlaşarkən maska taxın. Herpes virusundan qaynaqlanan uçuq və ya digər lezyonlarınız varsa, bunları bir sarğı ilə örtün.
Unutmayın ki, yeni doğulmuş körpələr infeksiyalara qarşı olduqca həssasdır. Körpəni öpmək sevgi göstəricisidir, lakin bu sevgi bəzən onların ciddi şəkildə xəstələnməsinə səbəb ola bilər.
