Məşhur britaniyalı müğənni, "Qremmi" mükafatının laureatı Adel böyük səhnəni tərk etdiyini açıqlayıb.
Qaynarinfo BBC-yə istinadən xəbər verir ki, sənətçi qeyri-müəyyən müddətə karyerasına fasilə vermək qərarına gəlib.
Son iki ildə ulduz Las-Veqasdakı "Caesars Palace" otel-kazinosunda konsertlər verib. Onun çıxışları hər həftə baş tutub və artıq 23 noyabr şənbə günü ifaçı fasilədən əvvəl sonuncu dəfə səhnədə çıxış edib.
Adel artıq bir neçə dəfə yaradıcılıq tətilinə getməyi planlaşdırdığını açıqlayıb. Xüsusilə qeyd edib ki, bu, onun Las-Veqasdakı silsilə konsertlərindən sonra baş verəcək. Son çıxışı zamanı məşhur bildirib ki, pərəstişkarlarının onu növbəti dəfə nə vaxt görəcəyini bilmir. Bu barədə danışan müğənni göz yaşlarını saxlaya bilməyib və konsert həyatı üçün darıxacağını əlavə edib:
"Bunun üçün çox darıxacağam, sizin üçün çox darıxacağam. Növbəti dəfə nə vaxt yenidən çıxış etmək istəyəcəyimi bilmirəm".
Sənətçi daha əvvəl ictimai olmayan həyat yaşamaq və təqaüdə çıxmaq istədiyi üçün işinə ara verdiyini bildirib. O, özünü oğluna və sevgilisinə həsr etməyi planlaşdırır. İfaçı universitetə daxil olub, ingilis ədəbiyyatını öyrənmək istədiyini də paylaşıb.
"Hello", "Skyfall" kimi hitləri ilə tanınan ulduz deyib: "Universitetə daxil olmaq və bu təcrübəyə sahib olmaq istərdim, amma repetitorla onlayn təhsil alacağam. 2025-ci il üçün planım dərəcə almaqdır".
Yeri gəlmişkən, karyerası ərzində Adel dörd musiqi albomu buraxıb, onlardan sonuncusu - "30" - 2021-ci ildə çıxıb. Ulduz bir neçə dəfə "Qeammi" mükafatını qazanıb. 2012-ci ildə isə "Film üçün ən yaxşı mahnı" nominasiyasında "Oskar" və "Qızıl Qlobus" mükafatlarına layiq görülüb.
Aydın
