İsrail Qəzzada xəstəxanaları sistematik olaraq hədəfə almaqda davam edir.
“Cebheinfo.az” “Yeni Safak”-a istinadən xəbər verir ki, son bir ildən çox davam edən İsrailin hücumları nəticəsində Qəzza zolağında 1000-dən çox həkim və tibb bacısı həlak olub.
Qəzza yerli hakimiyyət orqanlarının məlumatına görə, 310-dan çox digər tibb işçisi həbs edilib, işgəncələrə məruz qalıb və həbsxanalarda edam edilib.
Yerli hakimiyyət orqanlarının məlumatında qeyd olunur ki, İsrail ordusu həmçinin tibbi ləvazimatların, səhiyyə heyətinin və yüzlərlə cərrahın Qəzzaya daxil olmasına mane olub.
Media ofisi İsrail ordusunu Qəzzada səhiyyə sistemini sarsıtmaq planının bir hissəsi olaraq sistematik olaraq xəstəxanaları hədəfə almaqda ittiham edib.
“İsrail ordusu bilərəkdən xəstəxanaları bombalayır, mühasirəyə alır və basqın edir, həkimləri və tibb bacılarını öldürür”, - bəyanatda deyilir.
Qeyd edək ki, Qəzzada bir ildən çox davam edən müharibədə əksəriyyəti qadın və uşaqlar olmaqla 44 200-dən çox insan həlak olub, 104 500-dən çox insan yaralanıb.
İsrail ordusunun Qəzzada hərbi əməliyyatları ciddi beynəlxalq reaksiyaya məruz qalıb. İsrail Qəzzada dinc yerli əhalini məqsədyönlü şəkildə məhv etməkdə ittiham olunur.
Noyabrın 22-də Beynəlxalq Cinayət Məhkəməsi (ICC) İsrailin baş naziri Benyamin Netanyahu və onun keçmiş müdafiə naziri Yoav Qallantın Qəzzada hərbi cinayətlər və insanlığa qarşı cinayətlər törətdiyinə görə həbs olunmasına order verib.
