“Əl-Hilal”ın braziliyalı hücumçusu Neymarın atası Neymar da Silva Santos futbolçunun gələcəyi ilə bağlı sualı cavablayıb.
Arena.az AS dərgisinə istinadən, ata Neymarın bu barədə cavabını təqdim edir:
“Nə olacağını görəcəyik. Biz heç vaxt heç nə planlaşdırmamışıq. Yeganə plan “Barselona”ya düşmək idi. Qalan hər şey… PSJ burulğanına çevrilmiş çılğın bir fikir idi və nə vaxtsa biz onun gedəcəyini anladıq. “Əl-Hilal” ilə də vəziyyət eynidir.
Transfer bazarı onun bərpasını gözləyir, amma o, həmişə olduğundan daha yaxşı qayıdır və bu dəfə də istisna olmayacaq. Onun 2025-ci ilə qədər qüvvədə olan müqaviləsi var. Biz hələ heç nə bilmirik”, deyə Neymarın atası vurğulayıb.
Neymar “Santos”un məzunudur. “Ney” 2009-2013-cü illərdə Braziliya klubunun əsas komandasında çıxış edib. Bu müddət ərzində Neymar “balıqlar”ın heyətində 225 oyuna çıxıb, 136 qol və 64 məhsuldar ötürmə ilə fərqlənib.
Xatırladaq ki, braziliyalı futbolçu ötən il DÇ-2026-nın seçmə mərhələsi çərçivəsində Braziliya millisinin Uruqvay yığmasına qarşı keçirdiyi oyunda (0:2) ağır zədə alaraq, dizinin çarpaz bağlarını yırtmış və bu səbəblə cərrahi əməliyyat edilmişdi. “Ney” ötən həftə Asiya Çempionlar Liqasının “Əl-Ayn”a qarşı oyununda nəhayət ki, yaşıl meydanlara qayıtmışdı. Buna rəğmən “Ney” növbəti oyununda yenidən zədə alaraq, iki həftə müddətinə sıradan çıxıb.
Avropada debütü “Barselona” ilə başlamış Neymar daha sonra Kataloniya klubunu öz isətəyi ilə tərk edib. 2023-cü ilin yayında, PSJ-də 6 il keçirdikdən sonra Neymar “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib. Bu məbləğ Neymarın təxmin edilən bazar qiymətindən dəfələrlə bahadır.
Təcrübəli hücumçu ötən mövsüm “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı hücumçunun transfer dəyərini 30 milyon avro məbləğində qiymətləndirir.
