(®) Ötən gün ABŞ-da proqnozların altında dərc olunan statistik məlumatlar fonunda beynəlxalq birjalarda dollar Yapon yeni qarşısında kəskin şəkildə ucuzlaşıb.
Belə ki, USD/JPY valyuta cütlüyü dünən səhər saatlarından indiyədək 154.470 səviyyəsindən 152.230 səviyyəsinə qədər enib. Amerika fond indeksləri isə çərşənbə axşamı gününü artım ilə bitiriblər, xüsusi ilə “Dow Jones” və “S&P 500” indeksləri tarixi rekord hədlərini yeniləyiblər.
Federal Açıq Bazar Komitəsinin (FOMC) 6-7 noyabr tarixli iclasının protokollarına əsasən, Federal Ehtiyatlar Sisteminin (FED) rəhbərliyi faiz dərəcəsinin tədricən daha da azaldılmasını dəstəkləyir. Pul-kredit siyasətinin perspektivlərini müzakirə edən iclas iştirakçıları qeyd ediblər ki, statistik məlumatların proqnozları doğruldacağı təqdirdə, yəni məşğulluq maksimum səviyyəyə yaxın qalarkən inflyasiya davamlı olaraq 2%-ə enməkdə davam edərsə, bu istiqamətdə mərhələli hərəkətin daha neytral faiz dərəcəsinə davam etdirilməsi məqsədəuyğun olacaq.
Xatırlamaq lazımdır ki, FED noyabr ayında uçot dərəcəsini 25 baza bəndi azaldıb illik 4.5%-4.75%-ə endirib və qeyd edib ki, ABŞ-da inflyasiyanın “bir qədər yüksək” qalmasına baxmayaraq, FOMC hədəfinə yaxınlaşıb və iqtisadi fəallıq zəifləyən əmək bazarına baxmayaraq, güclü templə artmaqda davam edir. Sentyabr toplantısında faiz dərəcəsi 50 baza bəndi azaldılıb.
“Conference Board” araşdırma şirkətinin çərşənbə axşamı verdiyi məlumata əsasən, ABŞ-da İstehlakçı İnam İndeksi noyabr ayında 109.6 bənd səviyyəsindən 111.7 bənd səviyyəsinədək yüksəlib. Bu, son 16 ayın ən yüksək səviyyəsidir. “The Wall Street Journal”-ın sorğusuna qatılan analitiklər isə göstəricinin orta hesabla 111 bəndədək yüksələcəyini proqnozlaşdırmışdılar. Həmçinin, ölkənin Ticarət Departamentinin məlumatına görə, ABŞ-da yeni evlərin satışı oktyabr ayında əvvəlki ay ilə müqayisədə 17.3% azalaraq illik nisbətdə 610000-ə qədər enib. Bu, son iki ilin ən aşağı göstəricisidir. Analitiklər yalnız 1.8%-lik azalmanın olacağını proqnoz edirdilər.
Bugün ABŞ-da açıqlanacaq istisadi göstəricilər bazar iştirakçılarının diqqət mərkəzində olacaq. Belə ki, Bakı vaxtı ilə saat 17:30-da Amerikada İşsizlik Müavinəti üçün Müraciətlərin Sayı, ÜDM, Ticarət Saldosu və Uzunmüddətli İstifadə Məhsulları üzrə Sifarişlərin Həcminin Baza İndeksi göstəriciləri, Bakı vaxtı ilə saat 19:00-da isə əhalinin şəxsi xərclərinə dair məlumatlar dərc olunacaq.
Məlumat "İnvest-AZ İnvestisiya Şirkəti"nin analitikləri tərəfindən hazırlanıb.
