Federal Xəstəliklərə Nəzarət və Qarşısının Alınması Mərkəzləri (CDC) ABŞ-də quş qripinə (H5N1) yoluxmuş uşağın olduğunu təsdiqləyib.
CDC bildirib ki, Kaliforniyalı uşaq yüngül simptomlar yaşayır, antiviral dərmanlar alıb və xəstəlikdən sağalır. Alınan nümunədə aşağı səviyyədə virus materialı var idi.
“Cebheinfo.az” “Amerikanın Səsi”-nə istinadən xəbər verir ki, bir neçə gün sonra aparılan sonrakı testlər H5 virusunun olmadığını, lakin digər ümumi tənəffüs xəstəliklərinin viruslarını aşkar edib.
Kaliforniya Xalq Sağlamlığı Departamentinin araşdırması çərçivəsində ailə üzvlərindən testlər götürülüb. Quş qripi üçün testlər mənfi çıxıb, lakin uşaqda olduğu kimi, bəzi hallarda digər ümumi tənəffüs xəstəliklərindən viruslar aşkar edilib. Kontaktların axtarışı davam edir, lakin bu günə qədər H5N1 virusunun xəstə uşaqdan başqalarına ötürülməsinə dair heç bir sübut yoxdur.
CDC qeyd edib ki, ABŞ-də H5N1 quş qripinin insandan insana ötürülməsi halları qeydə alınmayıb.
Xəstə uşaq da daxil olmaqla, bu il ABŞ-də 55 quş qripi hadisəsi baş verib ki, onlardan 29-u Kaliforniyadadır.
Agentlik ictimaiyyət üçün risklərin aşağı olaraq qaldığını, lakin yoluxmuş və ya potensial yoluxmuş heyvanlarla, o cümlədən quşlar, mal-qara və digərləri ilə təmasda olan insanların risk altında olduğunu bildirib.
Oktyabrın sonunda H5N1 virusu Oreqon ştatında yerli fermada donuzda qeydə alınıb ki, bu da ölkədə ilk belə haldır.
