Çempionlar Liqasının “Monako” ilə 5-ci tur səfər oyunu “Benfika”nın argentinalı sağ cinah hücumçusu Anxel Di Mariya üçün əlamətdar olub.
Arena.az məlumat verir ki, Di Mariya “qartallar”ın qələbəsinə iki məhsuldar ötürmə ilə töhfəsini verib.
Beləliklə, Di Mariya Çempionlar Liqasında verdiyi məhsuldar ötürmələrin sayını 41-ə çatdıraraq, həmyerlisi, ulduz hücumçu Lionel Messinin nailiyyətini (40 məhsuldar ötürmə) geridə qoyub.
İndi Di Mariyanı mütləq rekorddan cəmi 2 məhsuldar ötürmə ayırır. Bu rekord isə portuqal ulduz hücumçu Kristiano Ronaldoya məxsusdur. “Kriş” Avropanın ən mötəbər klub yarışında 42 məhsuldar ötürmə ilə bu göstəricidə mütləq rekordçudur.
Göründüyü kimi, Messi və Ronaldonun Avropadan kənarda oynamasını nəzərə alsaq, Di Mariyanın mütləq rekordun astanasında olduğu aydındır. Bunun üçün Di Mariya ikicə məhsuldar ötürmə verməlidir.
Anxel Di Mariya 2023-cü ilin yayından “Benfika”da çıxış edir. Di Mariya 2007-2010-cu illər aralığında da Lissabon klubunun uğurları üçün çalışıb. Argentinalı hücumçunun “qartallar”la müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Di Mariya “Benfika” üçün bütün yarışlarda 16 oyuna çıxıb, 8 qol və 5 məhsuldar ötürmə ilə fərqlənib.
Di Mariyanın “Benfika”nın heyətində çıxışının ümumi mənzərəsi 188 oyun, 40 qol və 48 məhsuldar ötürmədən ibarətdir.
Təcrübəli futbolçu karyerası ərzində “Yuventus”, PSJ, “Mançester Yunayted”, “Real” və “Rosario Sentral”da çıxış edib.
Anxel Di Mariya 2008-ci ilin sentyabrında debüt etdiyi Argentina yığmasının heyətndə 145 oyuna çıxıb, 31 qol və 32 məhsuldar ötürmə ilə fərqlənib. Di Mariya “albiseleste” ilə 2024-cü ildə Qətərdə keçirilmiş dünya çempionatının, Amerika Kubokunun (2021, 2024), 2008-ci Pekin Olimpiya futbol yarışının, Avropa və Cənubi Amerika çempionları arasında “Finalissima” oyununun qalibi olub. Di Mariya bu il yığma komandanın heəytində çıxışına xitam verdiyini açıqlayıb.
“Transfermarkt” internet-portalı 36 yaşlı veteran hücumçunun transfer dəyərini 3 milyon avro məbləğində qiymətləndirir.
