Niderlandlı futbol mütəxəssisi Rud van Nistelroy İngiltərənin “Lester Siti” komandasının baş məşqçisi təyin olunub.
Arena.az bu barədə Premyer Liqa təmsilçisinin rəsmi saytına istinadən xəbər verir.
Tərəflər müddəti 2027-ci ilin 30 iyununa qədər nəzərdə tutulmuş müqaviləyə imza atıblar.
Xatırladaq ki, “Lester Siti” rəhbərliyi baş məşqçi postu üçün Qrem Potter və Devid Moyeslə də danışıqlar aparırdı. Amma son anda onlar namizədlər siyahısından çıxarılıblar. “Tülkülər”in seçimi Nistelroydan yana olub. Amma o, bu gün – noyabrın 30-da baş tutacaq “Brentford”la səfər oyununda komandaya rəhbərlik edə bilməyəcək. Nistelroyun yeni klubundakı işinə dekabrın 1-dən etibarən başlayacağı bildirilir.
Nistelroy “Lester Siti”nin baş məşqçi postunda bir müddət öncə istefaya göndərilmiş Stiv Kuperi əvəz edib. Hansı ki, o, uğursuz nəticələr səbəbindən istefaya göndərilmişdi.
Stiv Kuper bu ilin yayından “Lester Siti”yə baş məşqçilik edirdi. 44 yaşlı mütəxəssisin bu klubla 2027-ci ilin 30 iyununa kimi müqaviləsi vardı. Uelsli məşqçi Lester təmsilçisini cəmi 14 oyuna çıxarıb. Komana bu görüşlərdə 4 qələbə qazanıb, 3 heç-heçə edib, 7 məğlubiyyətə üzülüb.
“Lester Siti” hazırda İngiltərə Premyer Liqasının turnir cədvəlində 10 xalla 16-cı pillədə qərarlaşıb. Komanda 12 oyunda 2 qələbə qazanıb, 4 heç-heçə edib, 6 məğlubiyyət görüb.
Rud van Nistelroyun sonuncu iş yeri İngiltərə Premyer Liqasının digər təmsilçisi “Mançester Yunayted” olub. Niderlandlı mütəxəssis bu komandadan noyabrın 11-də ayrılmışdı.
Nistelroy həmyerlisi, onu Mançester klubuna gətirmiş niderlandlı mütəxəssis Erik ten Haqın istefaya göndərilməsindən sonra, “Mançester Yunayted”in müvəqqəti çalışdırıcı kimi fəaliyyət göstərib. O, “Mançester Yunayted”i 4 oyuna çıxarıb, 3 qələbə qazandırıb və 1 heç-heçə edib. Topların fərqi isə 11:3 nisbətindədir.
Rud van Nistelroy 2022/2023 mövsümündə Niderlandın PSV komandasının da baş məşqçisi kimi çalışıb. Buna qədər isə o, Eyndhoven klubunun gənclərdən ibarət kollektivinə rəhbərlik edib.
