“Bayern”in kanadalı sol cinah müdafiəçisi Alfonso Deyvis “Lamborghini Urus”unun sükanı arxasında sərxoş halda polis tərəfindən saxlanılıb.
Arena.az bu barədə “Bild” nəşrinə istinadən məlumat verir.
Bildirilir ki, gecədə yoxlama zamanı zabitlər spirtin iyini hiss ediblər və Deyvisdən alkoqol müayinəsindən keçməsi üçün bölməyə gəlməsini istəyiblər. Müayinənin nəticəsi 0,6 promil olub. Vurğulanır ki, “Bayern” vəziyyəti şərh etməyib.
“0,6 promil spirt səviyyəsi cinayət deyil, qanun pozuntusudur. Bu halda Deyvisi 500 avro məbləğində cərimə və 1 aylıq həbs cəzası gözləyir”, – alman hüquqşünas Cennaro Fest bildirib.
Alfonso Deyvis futbola “Edmonton İnterneyşenls” klubunda qədəm qoyub, buradan “Edmonton Straykers”ə və ardınca isə “Vankuver Uaytkeyps”ə keçərək, böyük futbolda debüt edib.
2019-cu ilin yanvarında “Bayern” 14 milyon avro məbləğində xərc çəkərək, kanadalı futbolçunu “Vankuver Uaytkeyps”dən öz düşərgəsinə qatıb. Deyvisin “Bayern”lə müqaviləsinin müddəti 2025-ci ilin iyun ayının sonuna qədər qüvvədədir.
Cari mövsümdə Deyvis “Bayern”in heyətində 17 oyuna 3 məhsuldar ötürmə ilə fərqlənib.
Kanadalı futbolçunun Almaniya nəhənginin düşərgəsində çıxışının ümumi mənzərəsi isə 212 oyun, 11 qol və 34 məhsuldar ötürmədən ibarətdir.
Alfonso Deyvis 2017-ci ilin iyun ayında debüt etdiyi Kanada yığmasının heyətində 56 oyun keçirib, 15 qol vurub, 18 məhsuldar ötürmə verib.
Alfonso Deyvisin qənimətlər muzeyində “Bayern”lə qazandığı Almaniya Bundesliqası çempionluğu (5 dəfə), Almaniya Kuboku (2 dəfə), Almaniya Super Kuboku (3 dəfə), Çempionlar Liqası, UEFA Super Kuboku, FIFA Klub Dünya Kuboku var.
Fərdi qənimətlərə gəlincə, Deyvis Kanadada 4 dəfə (2018, 2020, 2021, 2022) “İlin futbolçusu” seçilib. Həmçinin Deyvis 3 qolla 2017-ci il CONCACAF Qızıl Kubokunun ən sərrast qolçusu olub.
“Transfermarkt” internet-portalı 24 yaşlı kanadalı müdafiəçinin transfer dəyərini 50 milyon avro məbləğində qiymətləndirir.
