Fransa yığmasının keçmiş futbolçusu Emmanuel Peti “Real”ın ulduz hücumçusu Kilian Mbappenin Madrid klubundakı uğursuz çıxışını şərh edib.
Arena.az Petinin bu barədə fikrini təqdim edir:
“Düşünürəm ki, o, həqiqətən də gözə gəlib. Mən belə şeylərə inanıram”, deyə Emmanuel Peti vurğulayıb.
Fransa futbolunun əfsanəsi Mişel Platini də “xoruzlar”ın və “Real”ın hücumçusu Kilian Mbappenin zəif oyunu ilə bağlı fikrini paylaşıb:
“Mən meydanda onun azacıq çaşqın olduğunu görürəm. Böyük çempion küldən qalxmalıdır. Kilianı böyük çempion edəcək məqam da məhz budur”, deyə Platini bildirib.
Bu arada “Real” Mbappeyə Madrid klubunda çətin dövrü keçməkdə kömək etmək üçün, komandanın fransalı keçmiş baş məşqçi və oyunçusu Zinəddin Zidana müraciət edib. İddiaya görə, 25 yaşlı futbolçuya ən çox təsir edən şəxslərdən biri də Zidandır. Zidan Mbappenin “Real”a keçidi üçün danışıqlarda və ulduz futbolçu ilə müqavilə imzalanmasında əlaqələndirici olaraq çıxış edib.
Xatırladaq ki, Kilian Mbappe UEFA Çempionlar Liqasının Liqa mərhələsinin “Liverpul”la 5-ci tur səfər oyununda vacib bir məqamda penaltini qaçıraraq, “Real”ın 0:2 hesablı məğlubiyyətində pay sahibi olub.
Mbappe 2024-cü ilin iyul ayında PSJ-dən azad agent qismində ayrılaraq “Real”a keçib. “Kral klubu” fransalı hücumçu ilə müddəti 2029-cu ilin iyun ayının sonuna qədər qüvvədə olacaq müqavilə imzalayıb.
Cari mövsümdə Kilian Mbappe “Real”ın heyətində 18 oyuna çıxıb. O, bu oyunlarda 9 qol vurub, 2 məhsuldar ötürmə verib.
