“Mançester Siti”nin baş məşqçisi Xosep Qvardiola İngiltərə Premyer Liqasının 13-cü turunda “Liverpul”a səfər oyununu şərh edib.
Arena.az xəbər verir ki, ispan mütəxəssis 0:2 hesablı məğlubiyytədən sonra bunları söyləyib:
“İlk 15-20 dəqiqədə onları dayanırmaq mümkünsüz idi, oyuna çox güclü başladılar, biz isə daha çox nəzarət və ötürmələr ilə oynamağa çalışdıq, amma bunu etmək çətin oldu. Onlar ilk qola layiq idilər. Birinci hissəyə yaxşı başlamışdıq, ikinci hissədə isə çox təhlükə yaratmadan yaxşı oynadıq.
“Liverpul”un hər iki cərimə meydançasında necə güclü olduğuna bələdəm. Onları təbrik edirəm. Buna inanmaq çətin olsa da, bizə yenidən başlamaq gərəkdir və biz sıfırdan başlayacağıq. Futbolçularıma çox güvənirəm, onların bu işin öhdəsindən gələ biləcəklərini bilirəm. Mövsümün sonuna qədər nə olacağını görəcəyik”.
İspan mütəxəssis həmçinin “şəhərlilər”in son oyunlardakı zəif çıxışına aydınlıq gətirib. Xatırladaq ki, “Mançester Siti” son 7 oyunun 6-da məğlub olub, Çempionlar Liqasında “Feyenoord”la ev oyununda isə 3:0 öndə olduğu üstünlüyü əldən verərək, 3:3 hesablı heç-heçə ilə barışıb:
“Bizə elə gəlir ki, komanda olaraq həmişə duyduğumuz təhlükə hələ də yoxdur. Müdafiədə isə nəinki bu gün, hətta bir neçə oyundur ki, kifayət qədər etibarlı deyilik, ona görə də müdafiədə etibarlılığı bərpa etməliyik”.
Xosep Qvardiola həmçinin “Liverpul” azarkeşlərinin ona münasibətdə hörmətsiz davranışına dair fikrini açıqlayıb. Xatırladaq ki, “Enfild” tribunaları oyunun sonunda “Pep”in ünvanına “səhər səni qovacaqlar” ifadəsini hayqırıb:
“Mən “Enfild”in mənim qovulacağımı hayqırmağa başlayacağını gözləmirdim. Bəlkə qovulmağa layiqəm! Nəticələrimizlə, bəlkə də məhz 6 Premyer Liqa və bir çox başqa qənimətlər qazandığım üçün hələ də öz yerimdəyəm… “Enfild”də bunu gözləmirdim, amma hər şey qaydasındadır. Bu, oyunun bir hissəsidir. Qalib gələndə gülürsən. Uduzanda isə sənə gülürlər. İnanılmaz döyüşlər olub. Yurgen Kloppla keçirdiyim vaxt mənim üçün unudulmaz idi”.
“Liverpul”a məğlubiyyət “Mançester Siti”ni İngiltərə Premyer Liqasının yarış cədvəlində 5-ci pilləyə salıb. “Şəhərlilər”in 13 oyundan 23 xalı var. “Liverpul” isə 34 xalla yarış cədvəlinin zirvəsində qərarlaşıb.
