Sumqayıtda Türkiyə vətəndaşı, 1984-cü il təvəllüdlü Ahmet Yeşilin azyaşlı övladı - 2022-ci ildə anadan olmuş Zeynəbi qətlə yetirməsinin detalları məlum olub.
Milli.Az demokrat.az-a istinadən xəbər verir ki, qətl hadisəsi 30 mart 2024-cü ildə baş verib. Ahmet həmin gün saat 23 radələrində rəsmi nikahda olduğu arvadı Günay ilə arasında şəxsi münasibətlər zəminində uzun müddətdir davam edən mübahisə yenidən başlayıb.
Mübahisə zamanı qızları Zeynəb dayanmadan ağladığından Günay onlarla birlikdə yaşayan anası azyaşlını onların otağına gətirib, uşağı sakitləşdirməsini tələb edib.
Həmin vaxt Ahmet əsəbiləşib ağlayan qızı Zeynəbdən yaxa qurtarmaq məqsədi ilə onu öldürmək qərarına gəlib. O, uşağı qucağına alıb evdən çıxıb, yaxınlıqda olan Xəzər dənizinin Sumqayıt şəhəri, H.Z.Tağıyev qəsəbəsi sahilinə aparıb. Dizinə qədər dəniz suyuna girərək azyaşlı olması ilə əlaqədar aşkar surətdə köməksiz vəziyyətdə olan Zeynəbi suya basıb, bir neçə dəqiqə həmin vəziyyətdə saxlayaraq boğub.
Uşağın hərəkət etmədiyini gördükdən sonra sahilə çıxıb. Lakin bu zaman Zeynəbin ayıldığını və hərəkət etməyə başladığını gördüyündən öz cinayətkar niyyətini başa çatdırmaq üçün yenidən dizinə qədər dənizə girib, Zeynəbi daha bir neçə dəqiqə suda saxlayıb. Bununla da Zeynəbin ölümünə səbəb olub.
Hadisəni törədən Ahmetin barəsində Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Ahmet ona elan olunmuş ittiham üzrə özünü təqsirli bilməyib. O, ifadəsində göstərib ki, Türkiyə Respublikasında yaşayıb, orada ailəsi və iki uşağı olub: "Sonradan təxminən 2021-ci ildə internet vasitəsilə Günay adlı qadınla tanış oldum. Bir müddət sonra sonuncu ilə ailə qurdum. Günay məndən əvvəl bir dəfə evlənərək boşandı. Həmin evlilikdən Tofiq adlı daun sendromlu 1 oğlan uşağı doğulub. Evləndikdən sonra biz bir müddət Malatyada yaşadıqdan sonra birlikdə Sumqayıt şəhərinə qayıdaraq, Günayın valideynləri Azadə və Əjdər, habelə Günayın əvvəlki nikahdan olan övladı ilə birlikdə yaşadıq".
Təqsirləndirilən şəxs qeyd edib ki, 2022-ci ildə onların Zeynəb adlı övladı dünyaya gəlib: "Günayla münasibətlərimiz hər zaman yaxşı olub, ailəmə, həmçinin Günayın birinci övladına qayğı ilə yanaşmışam. Mənimlə Günay namaz qıldıqlarına görə spirtli içki qəbul etməmişik. İlk vaxtlar münasibətlərimiz yaxşı olsa da, qızım doğulduqdan sonra Günay və qayınanam Azadənin münasibəti mənə qarşı dəyişməyə başladı. Hadisədən bir müddət əvvəl Sumqayıt şəhərində yerləşən "Karvan" Ticarət Mərkəzində dönərçi kirayə götürərək işlətdim. Araşdırılan hadisəni törədən zaman özümdə olmamışam, ağlım yerində olmadığına görə bu cür hərəkətlərə yol vermişəm".
Ahmet bildirib ki, hadisə baş verən gün - 30 mart 2024-cü ildə, səhərdən axşama kimi işdə olub, evə qayıdan zaman marketdən uşaqlara ərzaq alıb: "Evə gəldikdə uşaqlarla vaxt keçirəndən sonra istirahət etmək üçün öz otağıma keçdim. Mən otaqda olanda evə Günayın valideynləri - anası Azadə ilə atası Əjdər gəldilər. Bundan sonra otaqda olsam da, qızım Zeynəbin ağladığını, ancaq Günayın uşağı qucağına alaraq sakitləşdirmədiyini eşitdim. Halbuki bundan əvvəlki zamanlarda, Zeynəb belə ağladıqda Gunay onu qucağına alıb, ana südü verməklə sakitləşdirə bilib. Bununla belə, Gunay Zeynəbi sakitləşdirmək əvəzinə, anası ilə yüksək səslə barəmdə danışdı. Bu zaman mən yorğun oldum və otaqdan çıxmadım. Az sonra Günay uşaq bezi götürmək üçün otağa daxil oldu. Mənim həmin vaxt telefonla danışmama baxmayaraq, kiminlə telefonla danışdığımı soruşdu. Günayın bu sualına görə ona əsəbləşdim. Bu zaman Zeynəb ağlamağa davam etsə də, Günay yenə də onu sakitləşdirmək üçün heç nə etmədən hamam otağına keçdi".
Azyaşlı uşağının qatili deyib ki, daha sonra Azadə Zeynəbi onun olduğu otağa gətirib və "atası deyilsən, al uşağı susdur" deyib: "Daima Zeynəb ağladıqda yalnız anası onu sakitləşdirməyi bacarsa da, o bunu etmədi. Bununla belə həmin vaxt Zeynəbi sakitləşdirməyə çalışdım. Zeynəbi sakitləşdirmək üçün qucağıma götürdüm, dəsmalı üstünə saldım, mağazaya apardım və yalnız ona yeməsi üçün uşaq ərzaqları aldıqdan sonra Zeynəb sakitləşdi. Bununla belə marketdən çıxandan sonra Zeynəb yenidən ağlamağa başladı. Bu zaman mən əsəbi oldum. Zeynəbin sanki məndən kömək istədiyi ağlıma gəldiyi üçün bütün fikrimi onu sakitləşdirməyə yönəltdim. Heç nə düşünmədən Zeynəbi dəniz kənarına apardım. Orada da, mən dizimə qədər suya girərək Zeynəbi əlimdə suya batırdım. Təxminən 4 dəqiqə həmin vəziyyətdə saxladıqdan sonra sudan çıxardaraq sahilə qaytardım. Lakin bu zaman Zeynəbin nəfəs aldığını gördüm, yenidən dənizə girərək Zeynəbi təkrarən tam olaraq suya soxaraq, təkrarən 3-4 dəqiqə gözlədim. Sonra isə əlimdən suya buraxıb sahilə qayıdaraq oradan uzaqlaşdım. Mən əvvəllər heç vaxt qızımı incitməmişəm. Ailədə gərginliyə görə son zamanlar əsəblərim pozuldu. Uşağı dənizə aparmaqda məqsədim Günayın uşaqla maraqlanmadığı üçün ondan intiqam almaq olub. Mən hadisə törədərkən ağlım başımda olmayıb. Törətdiyim əməldən peşmanam. Mən özümü qatil hesab etmirəm. Hesab edirəm ki, mən həqiqətən, qatil olsaydım, Günay və onun anası həyatda olmazdılar. Onları öldürüb, cəzamı çəkəndən sonra qızım ilə birlikdə yaşayardım".
İş üzrə zərərçəkmiş Zeynəbin hüquqi varisi qismində ifadə verən anası Günayın sözlərinə görə, 2022-ci ildə doğulmuş mərhum Zeynəbin onunla Ahmetin övladı olub: "Sonuncu ilə ailə qurduqdan sonra, münasibətlərimiz normal olsa da, Ahmet bu hadisədən 1 ay əvvəldən dəyişdi. Məni evdə danışdırmadı, mənimlə ünsiyyəti olmadı. Hadisə günü də, yəni martın 30-da Ahmet işdən evə gəldi və öz otağına keçdi. Ahmet otağa keçdi, siqaret çəkərək telefonla qadınlarla danışdı. Mən otağa keçdikdə isə məni kobud danışdırdı. Həmin gün Ahmetin bu hərəkətlərindən qəzəbləndim, Ahmetə heç nə demədən özüm üçün bərkdən deyinməyə başladım. Ona "səni istəmirəm, mənə belə həyat lazım deyil" dedim. Bu zaman evdə kənar heç kim olmasa da, bir qədər sonra oraya anam Azadə, məndən az sonra isə atam Əjdər gəldi. Anam məndən hirsli olmağımın səbəbini soruşdum. Mən də dərdimi anam Azadə ilə bölüşdüm. Həmin vaxt anam Ahmetə heç nə bildirmədən mənə "öz məsələnizdir, öz aranızda həll edərsiniz" dedi. Bu zaman mən danışa-danışa Ahmetin olduğu otağa girdim, yatmaq üçün uşaqları rahatladım. Ahmet isə heç mənə məhəl də qoymadı. Həmin vaxt çox əsəbləşdiyim üçün səhhətim pisləşdi və divanda uzandım. Anamdan da mənə gətirməsi üçün su istədim. Həmin vaxt südəmər qızım Zeynəb ana südü içdi, qucağımdan yerə düşdü".
Günayın ifadəsinə görə, bundan sonra Zeynəb onun ilk nikahından olan daun sindromlu oğlu Tofiqin əlindən telefonu almaq istəyib, Tofiq isə telefonu vermədikdə isə Zeynəbə gedərək həmin vaxt öz otağında olan atasından telefonunu istəməsini deyib: "Zeynəb isə Ahmetin yanına getməyərək ağlamağa başladı. Az sonra anam Tofiqi yatızdırmağa apardı. Mən özüm isə əsəbi halda qalxaraq hamam otağına keçdim. Bu zaman Zeynəb ağlamağa davam etdiyi üçün anam Azadə gələrək Zeynəbi qucağına götürdü. Lakin Zeynəb anamın qucağımda dayanmayaraq yerə düşdü. Bundan sonra anama Zeynəbi otağına apararaq, mənim hamamda olduğumu və mənsiz yatmadığı üçün Tofiqi yatızdıqmağa getdiyini dedi, Zeynəb atasını istədiyini dedi. Bu danışılanları mən hamamdan eşitdim. Az sonra Zeynəb sakitləşdi. Mən hamamdan çıxdım. Elə bu vaxt, yəni saat 23 radələrində Ahmet öz əynini geyinərək otaqdan çıxdı. Bu zaman Zeynəb Ahmetin qucağında olub. Ahmet Zeynəbin üstünə dəsmal ataraq evdən çıxdı. Anam Azadə bunu görərək ondan haraya getdiyini soruşdu. Ahmet birazdan gələcəyini deyərək qucağında olan Zeynəblə birlikdə getdi. Zeynəbi sakitləşdirərək qaytaracağını düşünsək də, Ahmet qayıtmadı. Bir qədər sonra Ahmetə zəng etməyə çalışsaq da, telefon bağlı olub. Biz qohumlarımın evinə zəng edərək Ahmeti tapa bilmədiyimiz üçün səhəri günü, tezdən Ahmetin iş yerinə gedərək saat 12-yə kimi anam ilə birlikdə orada gözləsək də, Ahmeti tapa bilmədiyimiz üçün evə qayıtdıq. Avtobusdan düşüb evə piyada gedərkən yolda polis əməkdaşının orada olanlara telefonda nəsə göstərdiyini gördük. Onlara yaxınlaşanda polis əməkdaşı telefonda olan şəkli bizə də göstərdi, şəkilə baxanda Zeynəbin dənizin kənarında yerdə uzanıqlı halda olduğunu gördüm".
Bu cinayət işinə Sumqayıt Ağır Cinayətlər Məhkəməsində baxılıb. Məhkəmənin hökmü ilə Ahmet 20 il müddətinə azadlıqdan məhrum edilib. Onun cəzasını ciddi rejimli cəzaçəkmə müəssisəsində çəkməsi müəyyən edilib.
Milli.Az
