“Karvan” üç min azarkeşin gözü önündə zirvəni əldən verdi - ŞƏRH

Noyabrın 27-29-u aralığında futbol üzrə ölkə çempionatının 1-ci liqasında 8-ci turun oyunları keçirildi.

Açılış matçında çempionluğa iddialı “İmişli” autsaydar “Qaradağ Lökbatan”ı məğlub etdi. Təmir edilmiş stadionda ilk oyununu keçirən komanda qələbə sayəsində ilk “üçlük”dəki yerini möhkəmləndirdi. Lökbatan təmsilçisi isə hələ sonuncu pillədən xilas ola bilmir. Növbəti matçda “doğma divarlar” arasında “Zaqatala”nı sınağa çəkən MOİK qələbə qazandı. Belədə “hərbçilər” aşağı pillələrdə qərarlaşan komandalardan bir qədər aralandı. Bölgə təmsilçisi isə ardıcıl üçüncü sınaqdan üzüağ çıxa bilmədi. Görünür, Rüstəm Məmmədovun komandası enişdədi. Turun üçüncü matçında autsayderlərin dueli baş tutdu. Gərgin keçən, 6ı qolun vurulduğu oyunda qalib müəyyləşmədisə, bir xal “nur şəhəri”nin təmsilçisinə sərf etdi. Ağsulular isə 9-cu pillədən tərpənmədi.

Elə həmin gün liderlərin görüşünə şahidlik etdik. Yevlaxda keçirilən qarşılaşmada “Karvan” “Qəbələ”yə uduzdu. Düzdü, meydan sahiblərinin baş məşqçisi Kənan Kərimov “Futbol+”ə açıqlamasında hakimlərin hansısa tapşırıqla qərarlar verdiyini, qəsdən məğlub duruma salındıqlarını iddia etdi. Lakin bundan sonra məsələylə bağlı hansısa addımın atılacağı inandırıcı görünmür.

Yeri gəlmişkən, Yevlaxda həm də mövsümün azarkeş rekordu qırıldı. Belə ki, oyunu 3000 tamaşaçı izlədi. Hər halda, “Qəbələ” artıq liderdi və “qırmızı-qaralar”ı zirvədən salmaq çox çətin olacaq. Qəbələlilər hələ bir qol da buraxmayıb!

Tura dünən keçirilən “Cəbrayıl” – “Baku Sportinq” matçıyla yekun vuruldu. Hesabı qarabağlılar açsa da, qonaqlar əzmkar qələbə qazandı. Belədə bakılılar ardıcıl üçüncü oyunda rəqibini məğlub etdi. “Cəbrayıl” isə hələ sabit nəticələr qazanmaqda çətinlik çəkir.

1. Qəbələ 8 6 2 0 14-0 20
2. Karvan 8 6 0 2 18-10 18
3. İmişli 8 5 1 2 18-7 16
4. Cəbrayıl 8 4 1 3 10-6 13
5. Baku Sportinq 8 4 1 3 10-12 13
6. Zaqatala 8 3 2 3 12-12 11
7. MOİK 8 2 2 4 9-14 8
8. Mingəçevir 8 1 2 5 9-17 5
9. Difai 8 1 2 5 11-20 5
10. Qaradağ Lökbatan 8 1 1 6 7-20 4

Bombardirlər: Bəhruz Teymurov (Karvan) – 9, Seyxan Fərəcov, Pablo Enrike Alveş (hər ikisi “İmişli”) – 5.

Növbəti turun oyunları dekabrın 11-13-ü aralığında keçiriləcək: Qaradağ Lökbatan – MOİK, Baku Sportinq – Difai, Zaqatala – Karvan, Mingəçevir – İmişli, Qəbələ - Cəbrayıl.

KƏNAN BAHADIR

• Stadion
• Futbol
• Matç
• Qələbə
• Çempionat
• Qaradağ Lökbatan
• İmişli