Vyetnamlı biznesmen Mi Lan (Truong My Lan), 44 milyard dollarlıq maliyyə fırıldağı səbəbilə ölüm cəzasına məhkum edilmişdi. O, edamdan yayınmaq üçün 9 milyard dollar ödəniş etməlidir.
Valyuta.Az "Arise News"a istinadən xəbər verir ki, 68 yaşlı Mi Lan, dünyanın ən böyük bank fırıldağı hesab edilən hadisədə ölüm cəzasına dair apellyasiya şikayətini uduzub. Vyetnam qanunvericiliyinə əsasən, o, qanunsuz əldə etdiyi məbləğin 75%-ni ödəyərsə, cəzası ömürlük həbslə əvəzlənəcək.
Bu ilin aprelində məhkəmə Mi Lanın gizli şəkildə ölkənin beşinci ən böyük bankı olan "Saigon Commercial Bank"ı idarə etdiyini və saxta şirkətlər vasitəsilə 10 ildən artıq müddət ərzində 44 milyard dollarlıq kredit və vəsait götürdüyünü müəyyən edib.
Prokurorların dediyinə görə, bu məbləğin 27 milyard dolları mənimsənilib, 12 milyard dolları isə mənimsəmə kimi təsnif edilib. Bu ciddi maliyyə cinayətinə görə ona ölüm cəzası verilib.
Bu qərar nadir hallarda baş verir və Mi Lan Vyetnamda "ağ yaxalı cinayətlər" üçün ölüm cəzası alan azsaylı qadınlardan biridir.
Mi Lanın vəkilləri onun 9 milyard dollar tapmaq üçün mümkün qədər sürətlə çalışdığını deyib. Lakin aktivlərini nağdlaşdırmaq çətinlik törədib.
Bəzi aktivlər Ho Şi Min şəhərindəki lüks əmlaklardan ibarətdir və nəzəri olaraq tez satıla bilər. Digərləri isə səhmlər və ya başqa bizneslərdəki paylar və ya əmlak layihələri şəklindədir. Ümumilikdə, dövlət bu dələduzluqla bağlı minə yaxın aktiv müəyyən edib və onlar hazırda dondurulub.
Böyük iş xanımı dostlarına müraciət edərək ona borc verilməsini istəyib ki, bu məbləği toplamağa çalışsın. Onun vəkilləri maliyyə səbəblərinə görə məhkəmədən yüngüllük göstərilməsini istəyiblər. Bildiriblər ki, ölüm hökmü altında olarkən onun aktivlərini və sərmayələrini satmaq üçün ən yaxşı qiyməti əldə etmək çətin olacaq və beləliklə, 9 milyard dollar toplamaq daha çətinləşəcək.
Vəkillərin fikrincə, ömürlük həbs cəzası verilərsə, vəziyyət daha yaxşı ola bilər.
“Onun ümumi aktivlərinin dəyəri tələb olunan kompensasiya məbləğini aşır,” vəkil "Nguyen Huy Thiep" apellyasiyası rədd edilməzdən əvvəl deyib.
“Lakin bunların əksəriyyəti daşınmaz əmlakdır və satılması vaxt tələb edir. Mi Lan ümid edir ki, məhkəmə kompensasiya üçün əlverişli şərait yaradacaq.”
Vyetnam ölüm hökmünü dövlət sirri kimi saxlayır. Hökumət ölüm hökmündə olanların sayı barədə məlumat yaymır, lakin insan hüquqları təşkilatlarının məlumatına görə, bu rəqəm 1.000-i keçir və Vyetnam dünyada ən çox edam həyata keçirən ölkələrdən biridir.
Əgər Mi Lan bu baş verməzdən əvvəl 9 milyard dolları qaytara bilsə, böyük ehtimalla həyatı xilas ediləcək.
Rəhim
