Azərbaycanın Rusiyadakı səfiri Rəhman Mustafayev Dövlət Dumasının sədr müavini, Azərbaycan parlamenti ilə əlaqələr üzrə deputat qrupunun kuratoru Aleksey Qordeyevlə görüşüb.
AZƏRTAC xəbər verir ki, söhbət zamanı müttəfiqlik fəaliyyəti səviyyəsində ikitərəfli münasibətlərə, o cümlədən Azərbaycan-Rusiya parlamentlərarası təmasların aktivləşdirilməsinə dair aktual məsələlərə toxunulub.
Tərəflər Bakıda uğurla başa çatmış BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına (COP29) xüsusi diqqət yetiriblər. Bu kontekstdə Rusiya tərəfi tədbirin yüksək səviyyədə təşkilini qeyd edib və göstərilən qonaqpərvərliyə görə minnətdarlığını bildirib.
Görüşdə hər iki tərəfin parlamentlərarası əməkdaşlığın möhkəmləndirilməsi, onun praktiki məzmunla doldurulması istiqamətində birgə işi davam etdirmək niyyəti təsdiqlənib.
