Bütün dünyada məşhur “Harri Potter” film seriyasındakı Qodrik Qriffindorun qılıncının replikaları Yaponiyada əsl problemə çevrilib.
“Cebheinfo.az” xəbər verir ki, sözügedən qılıncların Yaponiyada satılan nüsxələri “əsl qılınc kimi iti” olduqları və ölkənin silah qanununu pozduğu üçün geri çağırılıb. Şirkətdən verilən açıqlamada qılıncların 2023-cü ilin mayı ilə 2024-cü ilin aprel ayları arasında satıldığı bildirilib. Qodrik Qriffindorun qılıncının 350-dən çox replikası hər biri 200 dollara satılıb.
Məlumatda müştərilərə qılıncların qaytarılması və pulu geri almalarına köməklik göstəriləcəyi qeyd olunub. Yaponiyada qüvvədə olan qanuna görə, 6 santimetrdən uzun bıçaq gəzdirmək qadağandır. Qanunu pozanlar iki ilə qədər həbs cəzası ala bilər.
Qeyd edək ki, Harri Potter film seriyası “Sneyp”, “Voldemort”, “Harri”, “Hermiona”, “Dambldor” kimi bir çox personajları ilə əfsanəyə çevrilib.
