“Qafqazinfo” bu məqamda İcbari Tibbi Sığorta üzrə Dövlət Agentliyinin Tibbi xidmətlər və dərman vasitələri departamentinin baş məsləhətçisi Kamal Süleymanovla həmsöhbət olub.
Həmin müsahibəni təqdim edirik:
- Xidmətlər Zərfinə tibbi xidmətlər daxil edilərkən hansı meyarlar əsas götürülür?
- Xidmətlər Zərfində olan xidmətlər toplusunun tərkibi və məzmunu dövrü olaraq dəyişdirilir və genişləndirilir. Bu proses Azərbaycan Respublikası Nazirlər Kabinetinin 2020-ci il 2 dekabr tarixli 478 nömrəli Qərarı “Tibbi xidmətlərin xidmətlər zərfinə daxil edilməsi və ya tibbi xidmətlərin xidmətlər zərfindən çıxarılması meyarları və qaydası”na əsaslanır. Burada son 5 il ərzində olan xəstəliklər zamanı əhalinin ölüm faizi yüksək və geri dönməyən əlillik yaradan vəziyyətlər ilə bağlı statistik rəqəmlər əsas götürülür. Bundan əlavə, vətəndaş müraciətləri və tibb müəssisələrinin, aparıcı tibbi ictimai cəmiyyətlərin müraciətləri də toplanılır, müzakirə olunur və qanunvericiliyə uyğun olaraq Xidmətlər Zərfinə yeni xidmətlər əlavə olunur.
- Hansı yeni tibbi xidmətlərin Zərfə əlavə olunması gözlənilir?
- Beyin, ürək əməliyyatları, oftalmoloji xidmətlərin genişləndirilməsi, lor-cərrahiyyə, neyrocərrahiyyə ilə əlaqəli bir sıra cərrahi prosedurların artırılması planlaşdırılır. Hazırda bu məsələlər ictimai müzakirədə olduğuna görə, baxılma ərəfəsindədir. Biz öz fikirlərimizi bu sahədən olan mütəxəssislərlə paylaşmışıq və onlardan geridönüşlər gözləyirik. Onun əsasında da müzakirələrin növbəti mərhələləri başlayacaq. Bundan başqa, hazırlanan yeni Xidmətlər Zərfində tibbi xidmətlərin adı daha izahlı, ətraflı yazılıb və təkmilləşdirilib. Məsələn, ürək cihazlarının implantasiyası ilə bağlı xidmətlərdə elektrokardiostimulyatorun növləri, əməliyyata daxil olan prosedurların təfərrüatlı ifadəsi, trombolizis terapiyası yəni qan laxtalarını əridərək damarları açmaq məqsədilə istifadə olunan fibrinolitik maddələrin adları qeyd olunub.
- Bir müddətdir dərman vasitələrinin icbari tibbi sığorta təminatına alınması ilə bağlı məsələ müzakirə olunur. Artıq bununla bağlı qanuna dəyişiklik layihəsi Milli Məclisdə müzakirəyə çıxarılıb və oxunuşdan keçib. Burada hansı vasitələrdən söhbət gedir?
- Agentliyimiz tibbi sığorta haqqında qanuna dəyişiklik layihəsi hazırlayıb. Müsbət hal odur ki, artıq Milli Məclisdə buna baxılıb və layihə üçüncü oxunuşdan keçib.
Xəstəliklərin diaqnozuna uyğun olaraq həkim resepti əsasında yazılan dərman preparatlarının mərhələli qaydada təminatı tərəfimizdən nəzərdə tutulub. Konkret desək, biz bunu 3 mərhələyə bölmək niyyətindəyik. Qan-damar xəstəlikləri, həzm sistemi xəstəlikləri, tənəffüs və ağciyər xəstəliklərinin dərmanlarının mərhələli şəkildə təminatı nəzərdə tutulur.
- Ötən ay süd vəzi xərçəngi ilə mübarizə ayı idi. Bilirik ki, onkoloji xəstəliklərin müayinəsi və diaqnostikasının da icbari tibbi sığorta təminatındandır. Lakin bir çox hallarda insanlar bununla bağlı ətraflı məlumata malik olmurlar. İstərdim, bu barədə məlumat verəsiniz. Həmçinin gələcəkdə onkoloji xəstəliklərin müalicəsi də icbari tibbi sığortaya daxil edilə bilərmi?
- Xidmətlər Zərfində ən çox istifadə olunan laborator diaqnostik onkomarkerlər təminata alınıb. Pasiyentlər ixtisaslı həkim müayinəsinə getdiyi zaman onda süd vəzi xərçəngi şübhəsi yaranarsa, onu dəqiqləşdirmək üçün Xidmətlər Zərfi çərçivəsində mammoqrafiya , o cümlədən digər müayinələrdən də tibbi göstərişə əsasən yararlana bilərlər. Onkoloji diaqnostik müayinələr qrupunda Pap-testlər var, o da Xidmətlər Zərfində öz əksini tapıb. Pasiyentdə onkoloji xəstəlik diaqnozu təsdiqlənərsə, müalicə dövlət proqramı çərçivəsində aparılır.
Həmçinin onkoloji xəstələrin müalicəsi zamanı orqanizmdə laborator qan analizinin nəticələrinin izlənilməsinə zərurət yaranır. Bu zaman pasiyent TƏBİB-in tabeliyindəki xəstəxanalara müraciət etməklə analiz verə bilər. Bundan əlavə, Agentliyimiz tərəfindən müvafiq qurumla görüşlər keçirilib. Hazırda bu məsələnin statistik və resurs analizi gedir, mexanizmi araşdırılır. Bu analizlər yekunlaşanda yeniliklər barəsində ictimaiyyətə məlumat veriləcək.
