Çində arxeoloji qazıntılar zamanı yeni insan növü aşkara çıxarılıb. Tədqiqatçılar bildirirlər ki, onlar elmin indiyə qədər tamamilə tədqiq edə bilmədiyi yeni insan növü hesab olunan 16 "Homo juluensis" fərdinin qalıqlarını taparaq araşdırıblar.
Reyting.az-ın məlumatına görə, alimlər bu tapıntının təxminən 200.000 il əvvələ aid olduğunu iddia edirlər.
"Nature" jurnalı yazır ki, "Homo juluensis" insan özünün qeyri-adi anatomiyası ilə seçilir. Bu insan növünün böyük dişləri və geniş kəllələri var. Hətta baş ölçüləri də onları digərlərindən fərqləndirir. Çox qədim insan növü kimi "Homo juluensis"-lərin kəllələrinin fərqli quruluşu neandertalları, həmçinin “Homo sapiens”ləri üstələyir.
Hominidlərin tapılan qalıqları ilə yanaşı, qazıntılar zamanı həm də onların keçmiş həyat tərzini göstərən bir çox artefaktlar da aşkar edilib. Daş alətlər, bəzi heyvan sümükləri "Homo juluensis" insan növünün çox mahir ovçu olduğunu sübuta yetirir. Elm adamları güman edirlər ki, əslində bu insanlar həm də ilk at ovçuları olublar. Onlar vəhşi atları əhilləşdirməyi düşünməyən, daim məkan dəyişməklə, həyat üçün münbit torpaqlar axtaran "Homo juluensis" insanları kimi həmişə kiçik qruplar halında yaşayıblar.
Tədqiqatçıların Çin tapıntıları üzərində araşdırmaları göstərir ki, "Homo juluensis" insanının mövcudluğu Buz dövrünün başlanğıcı və əhəmiyyətli iqlim dəyişiklikləri ilə üst-üstə düşür. Təxminən 120.000 il öncə "Homo juluensis"-in nəslinin kəsilməsinə səbəb ola bilən Homo sapiens miqrasiya populyasiyalarını və mümkün rəqabətlə birlikdə yaşamaq uğrunda çox böyük mübarizə aparmaları, nəticədə isə soyuq qışın, həm də uzun müddət davam edən quraqlığın sərt şərtləri daxilində bu insan növünün məhv olması ehtimalını irəli sürürlər.
Qalıqların təhlili göstərir ki, Sibirdə tapılmış denisovalılarla bəzi anatomik oxşarlıqlar olsa da, yeni "Homo juluensis" insan növünün neandertallarla birbaşa əlaqəsi yoxdur.
Əlavə tədqiqatlar “Homo juluensis”-in insanın təkamül ağacındakı yerini aydınlaşdırmağa, onların həyatı və yoxa çıxması ilə bağlı daha çox təfərrüatı aşkar etməyə kömək edəcək.
Oqtay QORÇU
