İspaniya La Liqasının 19-cu turunda Bilbao “Atletik”inə qarşı səfər oyunu (1:2) İspaniya nəhəngi “Real” üçün xoşagəlməz bitib.
Arena.az məlumat verir ki, Madrid təmsilçisi məğlub olmaqla, klubun son 5 mövsümünün antirekordunu təkrarlamış olub.
Beləliklə, paytaxt klubu 2024/2025-ci illər mövsümündə 5-ci məğlubiyyətini yaşayıb. Bu da “qaymaqlılar”ın italyan mütəxəssis Karlo Ançelottinin rəhbərliyi altında mövsümün ilk yarısında məğlubiyyət rekordunu təkrarlaması ilə əlamətdardır. Daha əvvəl müvafiq dövrdə 5 məğlubiyyəti “qaymaqlılar” 2020/2021-ci illər mövsümündə yaşayıblar.
Xatırladaq ki, bundan əvvəl “qaymaqlılar” “Liverpul” (0:2), “Milan” (1:3), “Barselona” (0:4) və “Lill”ə (0:1) uduzmuşdular.
Ümumilikdə, İspaniya nəhəngi bütün yarışlarda keçirdiyi son 11 oyunda 5-ci məğlubiyyətlə üzləşib. Müqayisə üçün əlavə edək ki, bundan əvvəl komanda əvvəlki 73 oyunda cəmi 4 məğlubiyyət almışdı.
“Atletik”ə məğlubiyyət “Real”a sahib olduğu şərti lider mövqeyini itirməsi hesabına başa gəlib. La Liqada keçirdiyi 15 oyundan 33 xal toplamış son çempion hazırda yarış cədvəlinin 2-ci pilləsində qərarlaşıb. Çempionata 16 oyundan 37 xalla “Barselona” başçılıq edir.
