Bu gün Azərbaycanın teatr va kino aktyoru, rejissor, əməkdar mədəniyyət işçisi Məmmədkamal Kazımovun 95 illik yubileyinə həsr edilmiş xatirə gecəsikeçirilib.
Teleqraf.com xəbər verir ki, Dövlət Film Fondunda keçirilən gecədə mədəniyyət və incəsənət xadimləri iştirak edib.
Xalq artisti Hacı İsmayılov bildirib ki, teatrda ona ilk rolu verən məhz Məmmədkamal Kazımov olub.
"İlk dəfə Məmmədkamal müəllimi "Bir cənub şəhəri" filminin çəkilişlərindəgörmüşəm. O zaman uşaq idik, dedilər ki, film çəkilir, biz də ora əsasən Eldənizə (Eldəniz Zeynalov-red) baxmağa gedirdik. Amma orda Eldar Quliyevi, Rasim Ocaqovu və Məmmədkamal Kazımovu gördüm.1970- ci ildə teatra gələndə görkəmli sənətkarlarla qarşılaşdım. Amma içərisində mənə çox səmimi yanaşan Məmmədkamal müəllim oldu. Biz onunla dost olmuşuq. O uzun müddət teatr sənətinə xidmət edib. Onu həmişə xatırlayıram".
Xalq artisti Rafiq Əzimov qeyd edib ki, Məmmədkamal müəllimlə onun hazırladığı üç tamaşada birlikdə çalışıb.
"Üçü də maraqlı tamaşa idi. Sevinirəm ki, sənətimizin intibah dövründə Məmmədkamal müəllim və onun kimi sənətkarlarla işləmişik. Onun sənəti də insaniyyəti də yadda qalıb. O həmişə qəlblərdə yaşayacaq".
Xalq artisti Həmidə Ömərova Məmmədkamal Kazımovla birgə çəkildiyi "Yol əhvalatı" filminin çəkilişlərini xatırlayıb.O bildirib ki, filmdə ən yadda qalan səhnələrdən birini məhz Məmmədkamal Kazımovla oynayıb.
"Onun "Yol əhvalatı"nda yaratdığı obraz çox parlaq idi. Filmin çəkilişləri çay fabrikasının yanında aparılırdı. Bir etiraf edim, ssenariyə görə oynadığım Zümrüd obrazı biləndə ki, onu aldadıblar, çox əsəbləşir. Və orda Məmmədkamal müəllimlə qarşılıqlı bir neçə səhnələr çəkildi, amma təəssüf ki, filmin rejissoru Teymur Bəkirzadə o kadrları filmə daxil etmədi".
Tədbirdə çıxış edənlər Məmmədkamal Kazımovun ömrünün sonuna kimi səhnədən ayrılmadığını bildirib, onun milli peşəkar teatrımızın formalaşmasında özünəməxsus xidmətlərindən danışıblar.
Xatirə gecəsində aktyorun oynadığı filmlərdən kadrlar da nümayiş olunub.
