Zaman keçdikcə bir çox insanda bahalı geyim aludəçiliyi yaranmağa başlayır. Bir koftaya neçə yüz manat verərək, sanki bundan öyünürlər.
Maraqlıdır, insanların bahalı geyim almaq həvəsi nədən qaynaqlanır?
Bu barədə Hit.az-a açıqlama verən moda üzrə mütəxəssis Günel Xeybərova bildirib:
“İnsanların bahalı geyim almaq həvəsi bir neçə psixoloji, sosial və iqtisadi amillərlə əlaqəlidir. Bahalı geyimlər adətən yüksək sosial statusu və ya zənginliyi simvollaşdırır. İnsanlar daha bahalı geyim alaraq, özlərini daha prestijli və cəmiyyətin yüksək təbəqəsinə aid hiss edə bilərlər. Bu, onların başqalarına öz sosial mövqeyini göstərmək arzularından qaynaqlanır. Geyimlər müəyyən bir sosial sinif və ya həyat tərzinin göstəricisi kimi istifadə oluna bilər. Məsələn, marka geyimləri, məşhur dizaynerlərin məhsulları daha çox diqqət çəkir və insanlar bu cür geyimlərlə özlərini cəmiyyətdə fərqləndirmək istəyirlər.
İnsanlar tez-tez başqalarının nəzərini çəkmək və cəmiyyətdə müəyyən bir təsir yaratmaq istəyirlər. Bahalı geyimlər, onların gözləntilərini və dəyərlərini əks etdirən vizual bir dil yaradır. Media, xüsusən sosial şəbəkələr, reklamlar və dəb mədəniyyəti, bahalı markaların və geyimlərin cazibəsini artırır. Ünlü insanların və influencerlərin bahalı geyimlər geyməsi, bu cür məhsulları almanın bir növ "məqsəd" halına gəlməsinə səbəb olur”.
Murad
