“Vest Hem”in yamaykalı mərkəz hücumçusu Maykl Antonio ağır yol-nəqliyyat hadisəsi ilə üzləşərək, xəstəxanalıq olub.
Arena.az bu barədə İngiltərə klubunun mətbuat xidmətinə istinadən məlumat verir.
Qəza Antonionun öz “Ferrari”sinin sükanı arxsında olarkən baş verib. Qəza nəticəsində avtomobil tamamilə yararsız hala düşüb:
“Vest Hem Yunayted” hücumçusu Maykl Antonionun bu gün yol qəzası keçirdiyini təsdiqləyə bilər. Klubun bütün işçiləri Maykl, onun ailəsi və dostları haqda düşüncələrdə və dualardadır.
Klub yenilənmiş məlumatı yaxın vaxtlarda dərc edəcək”, – “çəkicdöyənlər”in ilkin rəsmi bəyanatında bildirilib.
Qeyri-rəsmi mənbələrdən əldə edilmiş məlumata görə isə, xəstəxanaya təxliyə edilmiş yamaykalı futbolçunun vəziyyəti sabitdir. Ardınca bu xəbəri “Vest Hem” də təsdiqləyib:
“Vest Hem Yunayted” bu gün günortadan sonra Esseksdə yol-nəqliyyat hadisəsindən sonra Maykl Antonionun sabit vəziyyətdə olduğunu təsdiqləyə bilər.
Mayklın şüuru üstündədir, o, ünsiyyət qurur və hazırda Mərkəzi London xəstəxanasında yaxından müşahidə altındadır.
Bu çətin dövrdə hamıdan Mayklın və onun ailəsinin şəxsi həyatına hörmətlə yanaşmağı xahiş edirik.
Klub bu axşam əlavə şərh verməyəcək, amma yaxın vaxtlarda əlavə məlumatı açıqlayacaq,” – “çəkicdöyənlər”in son bəyanatında deyilir.
Xatırladaq ki, Antonio 2019-cu ildə də Milad ərəfəsində avtomobil qəzasına düşmüşdü.
Maykl Antonio 2015-ci ilin sentyabrdan “Vest Hem”də çıxış edir. Yamaykalı hücumçunun “çəkicdöyənlər”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Antonio “Vest Hem”in heyətində 15 oyun keçirib, 1 qol vurub, 1 assist edib. O, İngiltərə klubunun heyətində bütövlükdə 323 oyuna çıxıb, 83 qol və 41 assistlə yadda qalıb. Yamaykalı hücümçu “çəkicdöyənlər”lə Avropa Liqasını qazanıb.
Antonio 2021-ci ilin sentyabrında debüt etdiyi “Yamayka” yığmasının heyətində 21 oyun keçirib, 5 qol vurub, 1 məhsuldar ötürmə verib.
“Transfermarkt” internet-portalı 34 yaşlı Maykl Antonionu 4 milyon avro məbləğində qiymətləndirir.
