Azərbaycanın Ümummilli Lideri Heydər Əliyev vəfatının 21-ci ildönümü ilə bağlı İzmirdə anım tədbiri keçirilib.
Bakıvaxtı.az xəbər verir ki, Heydər Əliyev adına Peşə və Texniki Anadolu Liseyində baş tutan tədbirdə İzmir İl Milli Təhsil Müdiri Dr. Ömər Yahşi, Azərbaycanın Türkiyədəki səfirliyinin təhsil müşaviri Nəcibə Nəsibova, Əliağa İlçe Baş məmuru Zəkəriyyə Güney, Bələdiyyə sədri Serkan Acar, siyasi partiya nümayəndələri və SOCAR-ın Türkiyə təmsilçiləri iştirak edib.
Proqram bir dəqiqəlik sükutdan sonra İstiqlal Marşının və Azərbaycanın Dövlər Hhimninin səsləndirilməsi ilə davam etdirilib.
Anım mərasimində qeyd edilib ki, tədbir iştirakçıları tarixi yaddaşımız, dilimiz və dünyagörüşümüzlə bir qəlbin iki yarısını paylaşdığımız qardaş ölkə Azərbaycanın ulu öndəri mərhum Heydər Əliyevin xatirəsinə bir araya gəlib:
“Biz - Türkiyə və Azərbaycan olaraq coğrafiyada əbədi və dərin izlər qoyan Heydər Əliyevin ruhlandırıcı mənəvi irsini yeni nəsillərə ötürmək istəyirik. Biz çinarın budaqlarıyıq...”
Vurğulanıb ki, Heydər Əliyevin həyat yolu tək Azərbaycan xalqı ilə məhdudlaşmayıb:
“Ulu öndər Türk dünyasını qüdrətli görmək istəyirdi. Biz qardaşlığı, birliyi, həmrəyliyi ölkələrimiz arasında qurulan dil, tarix və inanc körpüsü ilə daşıyacağıq. İki ölkə arasında qurulan qədim körpülər yeni nəsillərlə gündən-günə möhkəmlənəcək”.
Mərasim içtirakçıları Ulu öndərin Türkiyə ilə Azərbaycan arasında əlaqələrin möhkəmlənməsindəki xidmətlərinin heç vaxt unudulmayacağını vurğulayıblar.
Gecə İzmirdə yaşayan azərbaycanlı aktrisa Roza İbadova Kocamazın möhtəşəm ifası ilə başa çatıb.
Nərgiz Məmmədli
