Zaman-zaman sosial şəbəkələrdə bəzi universitet tələbələrinin diplomlarının ala bilməməsi ilə fikirlər dolaşır. Belə ki, tələbələrin bir qismi qeyd edir ki, diplomlarını hələ də ala bilməyiblər.
Şikayətləri nəzərə alaraq AzEdu.az Təhsil Portalı olaraq universitetlərə sorğu üvanladıq.
Sorğumuza cavab olaraq Azərbaycan Universitetinin (AU) mətbuat katibi Lalə Dilanova söyləyib ki, cari il məzunlarımıza diplomlarını oktyabr ayından veririk:
“Az da olsa diplomunu götürməyən məzunlarımız var. Səbəbi barədə məlumatımız yoxdur. Ola bilər ki, ölkə xaricindədirlər, yaxud müəyyən məişət qayğıları səbəbiylə vaxt tapıb götürə bilmirlər”.
Azərbaycan Dövlət Pedaqoji Universitetindən (ADPU) bildirilib ki, ötən tədris ilində məzun olan tələbələrin əksəriyyəti diplomlarını artıq almışdır:
“İstisna olaraq bəzi ixtisaslar üzrə diplomların verilməsi prosesi hələ də davam etdirilir. Lakin, ümumilikdə hər-hansı məzunun diplomunu almaması şəxsi səbəblərlə bağlı da ola bilər. Hələ də diplomunu almayan məzunlarımız istədikləri vaxt universitetə yaxınlaşaraq diplomlarını ala bilərlər”.
Bakı Avrasiya Universitetindən (BAAU) bildirilib ki, hazırda universitetin məzunların diplomları və onların əlavələrinin verilməsi prosesi getməkdədir:
“Noyabr ayından başlayaraq məzunlar ya şəxsən, ya da etibarnamə verdikləri şəxslər (valideyn, bacı-qardaş, qohum, dost və s.) tərəfindən diplom və əlavələri götürülməkdədir. Bununla bağlı universitetə yaxınlaşan məzunların məlumatları BAAU-nun Karyera və Təcrübə Mərkəzi tərəfindən götürülərək "Məzun Bankı"na əlavə edilir.
Gələcəkdə bu məzunlarla işin təşkili, onlar üçün karyera imkanları, görüşlər və digər istiqamətlərdə "Məzun Bankı"ndan istifadə ediləcəkdir.
Hazırda diplomlarını almayan tələbələrlə bağlı yuxarıda verilən məlumatlara əsasən konkret bir fikir bildirmək olmaz. Amma, diplomunu götürməmə, gecikmə əsasən hərbi xidmətdə olma, ailə həyatı qurma kimi hallara görə ola bilir”.
Azərbaycan Turizm və Menecment Universitetindən (ATMU) qeyd edilib ki, normativ təhsil müddətinin sonunda “Yekun Dövlət Attestasiyasından” müvəffəqiyyətlə keçən, bakalavr səviyyəsi üzrə təhsil alan tələbələrin diplomları vaxtında məzunlara təhvil verilib:
“Əvvəlki illərdə məzun ola bilməyən, akademik borclarını cari ilin sentyabr ayınadək ləğv edən tələbələrdən ötrü sentyabr ayında yenidən attestasiya təşkil edilib. Müvəffəqiyyət qazanan tələbələrin adları rəsmiləşdirilərək, müvafiq diplomların alınması üçün Azərbaycan Respublikasının Elm və Təhsil Nazirliyinə müraciət olunub.
Qeyd etmək lazımdır ki, nazirlikdən müraciətimizə geridönüş edilməyib və müvafiq diplomlar universitetə təhvil verilməyib. Diplomlar universitetə daxil olan kimi hazırlanıb tələbələrə ən qısa müddətdə təhvil veriləcək”.
Azərbaycan Texniki Universitetindən (AzTU) bildirilib ki, diplomlar hazırdır:
“Məzunlardan kimsə hələ də diplomunu almayıbsa bu diplomun hazır olmaması anlamına gəlmir. Məzunlar istədikləri vaxt universitetə gəlib diplomlarını götürə bilərlər”.
Azərbaycan Memarlıq və İnşaat Universitetindən (AzMİU) söylənilib ki, bakalavriat və magistratura səviyyəsi üzrə diplomlar təqdim olunur:
“Diplomlarını almayan tələbələrimiz var, amma diplomları verilməyən tələbələrimiz yoxdur. Diplomlarımız demək olar ki, hazırdır. Keçmiş məzunlarımıza da məlumat verilib ki, onlarda gəlib diplomlarını götürsünlər. Bəziləri müəyyən səbəblərdən yəqin ki, üzrlü səbəbdən yaxınlaşıb hələ götürməyiblər. Lakin bu çox böyük say deyil, az saydadır. Əksəriyyət məzunlarımız artıq diplomlarını gəlib götürüblər”.
Azərbaycan Dövlət Neft və Sənaye Universitetindən (ADNSU) bildirilib ki, ötən dərs ili 4166 tələbə məzun olub:
“Təxminən 3%-nin diplomları təqdim edilməyib. Səbəbləri isə bundan ibarətdir ki, bir qismi özləri gəlib diplomlarını götürməyiblər, bir neçə tələbə var ki,onlar əcnəbi olduğuna görə diplomları öz təsdiqini tapmalıdır. Bizim universitetdə ixtisasartırma və 2-ci ali təhsil var. Bu səbəbdən bəzi tələbələrin diplomları nazirlikdə yoxlanılma prosesində olduğuna görə onlara diplomlar hələki təqdim edilməyib. Yoxlanıldıqdan sonra təqdim ediləcək".
