Amerikanın “Time” jurnalı ABŞ-nin yeni seçilmiş prezidenti Donald Trampı ilin adamı elan edib.
Yeniavaz.com xəbər verir ki, jurnal bu barədə məlumatı “X” sosial şəbəkə səhifəsində dərc edib.
“Time” daha əvvəl Trampı 2016-cı ildə prezident seçkilərində qələbəsindən sonra ilin adamı elan edib. O, hazırkı prezident Co Bayden də daxil olmaqla, bu ünvanı alan 14 Amerika liderindən biridir.
Qeyd edək ki, jurnal 1927-ci ilin dekabr sayından ilin adamını seçir və onun şəklini üz qabığına qoyur. Qərar redaktorlar tərəfindən verilir. Bu illər ərzində Mahatma Qandi, Adolf Hitler, İosif Stalin, Uinston Çörçill, Martin Lüter Kinq, körpə bumerlər, “Apollon 8” astronavtları, personal kompüter, Mixail Qorbaçov, Bill Klinton, Ceff Bezos, eləcə də, Rusiya Prezidenti Vladimir Putin jurnal tərəfindən “ilin adamı” seçiliblər.
Xatırladaq ki, “Time” jurnalı 1923-cü ildən nəşr olunan Amerika jurnalıdır. Nəşrin bütün platformalardakı ümumi auditoriyası orta hesabla 100 milyon nəfəri keçir.
