İordaniya Krallığı Suriyadakı vəziyyətlə bağlı ərəblərarası görüşün keçirilməsi təşəbbüsü ilə çıxış edib.
“Report” xəbər verir ki, bu barədə Krallığın Xarici İşlər Nazirliyinin bəyanatında deyilir.
Qeyd olunub ki, görüşün dekabrın 14-də Qırmızı dəniz sahilindəki Akaba şəhərində keçirilməsi planlaşdırılır.
Misir, İordaniya, İraq, Livan və Səudiyyə Ərəbistanının daxil olduğu Ərəb Liqasının Suriya üzrə nazirlər komitəsinin üzvləri Bəhreyn, Qətər və Birləşmiş Ərəb Əmirliklərindən olan həmkarları ilə birlikdə Akaba şəhərində toplanacaq.
Bu görüşdən sonra İordaniyada Türkiyə xarici işlər naziri Hakan Fidan, ABŞ dövlət katibi Antoni Blinken və Aİ diplomatiyasının rəhbəri Kaya Kallas ilə səkkiz ərəb nazirinin görüşü keçiriləcək və burada BMT baş katibinin Suriya üzrə xüsusi nümayəndəsi Geir Pedersen də iştirak edəcək.
Akabadakı görüşlərdə BMT Təhlükəsizlik Şurasının 2254 saylı qətnaməsinə uyğun olaraq keçid dövrünün həyata keçirilməsi məqsədilə ölkədə inklüziv siyasi prosesi dəstəkləməyin, Suriya xalqının istəklərinə cavab verən, dövlət qurumlarının bərpasını təmin edən, ölkənin birliyini və ərazi bütövlüyünü qorumağın mümkün yolları müzakirə olunacaq.
