576 işsiz peşə qazanıb
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi daha 576 işsiz və işaxtaran şəxsi peşə hazırlığı kurslarına cəlb edib.
Onlardan 155 nəfəri üçün agentliyin Bakı, Gəncə, Göyçay və Qarabağ Peşə Hazırlığı Mərkəzlərində, 421 nəfəri üçün isə özəl tədris müəssisələrində peşə kursları təşkil olunub. Əmək bazarının tələblərinə uyğun peşələr üzrə təşkil olunan kurslarda müdavimlərə nəzəri və praktiki biliklər tədris olunur.
Kursları uğurla başa vuran şəxslərin işlə təminatına da dəstək göstəriləcək.
Fəal məşğulluq layihələri
Agentlik bu ilin yanvar–noyabr aylarında 366 min 900 şəxsi aktiv məşğulluq tədbirləri ilə əhatə edib. Onlardan 149 min şəxs münasib işlərlə təmin olunub, 16 min 100 nəfər isə kiçik ailə təsərrüfatlarını yaratmaları üçün özünüməşğulluq proqramına cəlb edilib.
Cari ilin 11 ayında 14 min 500 işsiz peşə hazırlığı kurslarına cəlb olunub, 187 min 300 şəxsə peşəyönümlü xidmətlər göstərilib.
Kiçik təsərrüfatlar çoxalır
Qurum, eyni zamanda, özünüməşğulluq proqramı iştirakçılarının avadanlıqlarla təminatını davam etdirir. Son bir həftədə paytaxt və regionlarda 784 nəfər işsiz bu proqram çərçivəsində aktivlərlə təmin olunub.
Mal və materiallar formasında verilmiş aktivlər hesabına proqram iştirakçıları üçün kənd təsərrüfatı, istehsal, xidmət sahələri üzrə kiçik təsərrüfatlar qurulub.
Qarabağ DOST əlillərin dostudur
Bərdədədəki Qarabağ Regional DOST Mərkəzindəki “RehaPoint” – Reabilitasiya Məntəqəsində ötən dövrdə 1450-dək əlilə reabilitasiya xidmətləri göstərilib.
Ötən il dekabrın 1-dən fəaliyyətə başlayan məntəqədə Dövlət Tibbi-Sosial Ekspertiza və Reabilitasiya Agentliyinin əməkdaşları əlilliyi olan bölgə sakinlərinə ambulator reabilitasiya xidmətləri göstərirlər. Həmin şəxslər burada ambulator formada müalicəvi bədən tərbiyəsi, əmək terapiyası, psixoloq və loqoped xidmətlərindən yararlanır.
Məntəqədə əlillərə ehtiyaclarına uyğun 800-dən çox reabilitasiya vasitəsi verilib.
Zərifə HÜSEYNOVA
XQ
