Dünyanın ən varlı adamlarının siyahısı yenilənib. İndi ən varlı şəxs olan İlon Maskın sərvəti yarım trilyon dollara yaxınlaşır.
Hafta.az-ın Bloomberg Billionaires İndex-ə istinadən yazdığına görə, İlon Maskın sərvəti indi 447 milyard dollara yüksəlib. Bu yüksəlişdə Tesla səhmləri rekord səviyyəyə çatıb və SpaceX 350 milyard dollar dəyərində səhmləri geri alıb. Bu addımlarla Maskın sərvəti bir gündə 62,8 milyard dollar artıb.
Birjada satılmayan SpaceX iyun ayında 210 milyard dollar dəyərində qiymətləndirilib. Dünən bu rəqəm 350 milyard dollar olaraq təyin olunub. Şirkətin dəyəri 6 ayda 67 faiz artıb. Maskın SpaceX-dəki payı 306,6 milyard dollar olaraq hesablanıb.
Tesla-nın səhmləri də rekord qırıb. Şirkətin dəyəri 1 trilyon 330 milyard dollara çatıb. Maskın Tesla-dakı payı 12 faizdir.
Bloomberg Billionaires İndex-ə görə, Maskdan sonra dünyanın ən varlı adamı Amazon-un qurucusu Ceff Bezosdur. Bezosun sərvəti 249 milyard dollardır. Bu məbləğ Maskın sərvətindən təxminən 200 milyard dollar aşağıdır.
Siyahıda üçüncü yerdə “Facebook”un yaradıcısı və baş direktoru Mark Zukerberq qərarlaşıb. Zukerberqin sərvəti 224 milyard dollar olaraq hesablanır.
Larri Ellison 198 milyard dollarla dördüncü, Bernard Arnoult 181 milyard dollarla beşinci, Larri Peyc 174 milyard dollarla altıncı, Bill Qeyts 165 milyard dollarla yeddinci, Sergey Brin 163 milyard dollarla səkkizinci, Stiv Balmer 155 milyard dollarla doqquzuncu, Uarren Baffet isə 144 milyard dollarla onuncu yerdədir.
