Almaniyanın Mülki Müdafiə və Fəlakətlərə Yardım üzrə Federal İdarəsi (BBK) vətəndaşlara diqqətəlayiq bir çağırış edərək, hər evə ən azı üç gün ərzində ehtiyaclarını ödəmək üçün hazırlıq görməyi tövsiyə etdi.
Musavat.com xarici mediaya istinadla xəbər verir ki, açıqlamada qida, su, nağd pul, akkumulyatorla işləyən radio və batareya kimi əsas ehtiyacların yığılmasının lazım olduğu vurğulanıb.
BBK-nın vitse-prezidenti Rene Funk T-online xəbər portalına verdiyi açıqlamada Almaniyanın təkcə hərbi müdafiə qabiliyyətini deyil, həm də mülki müdafiə və fəlakətdən mühafizə imkanlarını artırmalı olduğunu bildirib.
Funk vətəndaşları fövqəladə hallara və elektrik enerjisinin uzunmüddətli kəsilməsinə hazır olmağa çağıraraq deyib: “Elektrik kəsilməsi təkcə işıqlandırmaya deyil, həm də yemək bişirməyə, su təchizatı və rabitəyə təsir edir. “Biz internetin kəsilməsi və bankomatların sıradan çıxması kimi hallarla da rastlaşa bilərik”.
Almaniyanın kritik infrastrukturuna qarşı son dövrlərdə xarici texniki və hibrid hücumların artdığını bildirən Rene Funk bildirib ki, hər gün çox sayda kiber hücuma məruz qalırıq, lakin bir çox insanlar elektrik enerjisinin kəsilməsinin yarada biləcəyi ciddi problemlərdən xəbərsizdir.
Elektrik kəsilməsinin təkcə enerji ilə bağlı xidmətləri deyil, həm də su təchizatını poza biləcəyini ifadə edən Funk vətəndaşlara hazırlaşmaları üçün aşağıdakı tövsiyələri verib:
“İşıqlandırma: Batareya ilə işləyən lampalar, şamlar və ya kibrit kimi elektrikə etibar etməyən işıq mənbələrinə sahib olun.
Su ehtiyatı: Gündə adambaşına 1,5 litr olmaqla kifayət qədər miqdarda içməli su saxlayın.
Gigiyena: Şəxsi gigiyena üçün lazımi materialları təmin edin.
Ünsiyyət: Quraşdırma və ya batareya ilə işləyən radio alın.
Nağd pul: Bankomatların işləməyəcəyi halda özünüzdə nağd pul saxlayın.
Qida: Bişirmə tələb etməyən və uzun müddət saxlanıla bilən qidalarla ən azı 72 saatlıq ehtiyat hazırlayın”.
Qeyd edək ki, bu çağırış əhali arasında müəyyən əndişəyə səbəb olub.
Musavat.com
