Füzuli, 13 dekabr, Aydın Yavərzadə, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi Füzuli şəhər sakinləri üçün özünüməşğulluq proqramı çərçivəsində yaradılan kiçik təsərrüfatlara növbəti mediatur təşkil edib.
AZƏRTAC-ın bölgə müxbiri xəbər verir ki, jurnalistlərə Böyük Qayıdış proqramı çərçivəsində ata-baba yurdlarına qayıtmış sakinlərin sosial dəstəklə təminatı tədbirləri barədə məlumat verilib. Qeyd olunub ki, Füzuli şəhərinə köçürülən sakinlərdən 39 şəxs özünüməşğulluq proqramı çərçivəsində aktivlərlə təmin olunaraq kiçik təsərrüfatları qurulub.
Media nümayəndələri həmin şəxslərdən biri olan, müharibə veteranının övladı İsfəndiyarlı Ceyhun Cahid oğlunun təsərrüfatına baxış keçiriblər. O, özünüməşğulluq proqramı çərçivəsində “Dönərxana” zərfi üzrə avadanlıqlarla təmin edilib.
Həmçinin proqramın dəstəyi ilə Ağayarzadə Rüstəm Akif oğlunun “Avtoşinlərin təmiri və bərpası xidmətləri”, Nəsirova Vüsalə Vahid qızının “Qadın gözəllik salonu”, Quliyev Fazil Cəmşid oğlunun “Kişi bərbərxanası” zərfi üzrə qurduqları kiçik təsərrüfatlara baxış olub.
Proqram iştirakçıları onların məşğulluğunun təminatı, kiçik biznesə çıxış imkanlarına malik olmaları üçün görülən işlərdən razılıqlarını bildiriblər. Onlar öz təsərrüfatlarını yaratmaları üçün göstərilən dəstəyə görə dövlətimizin başçısına təşəkkürlərini ifadə ediblər.
