"Azərbaycan Cənubi Qafqazda həm ali təhsil səviyyəsinə görə, həm də elmi dərəcələrə görə ən sonuncu yerdə qərarlaşıb". Anews.az bildirir ki, bunu Milli Məclisin deputatı Qüdrət Həsənquliyev deyib.
Magistr və rezirantura oxuyanların pul müqabilində hərbi xidmətdən azad olunmasını buna görə təklif etmişdim. Onların verdiyi pullarla hərbidə olan kadrları daha da peşəkar yetişdirmək olar", - deputat bildirib.
Musavat.com bildirir ki, təhsil eksperti Kamran Əsədov deputatın iddialarına sosial şəbəkə hesabında bu cür mövqe bildirib:
"Azərbaycanın Cənubi Qafqaz regionunda ali təhsil səviyyəsinə və elmi dərəcələrə görə sonuncu yerdə olması ilə bağlı irəli sürülən iddialar reallığı əks etdirmir və bunu təkzib edən çoxsaylı faktlar mövcuddur".
Kamran Əsədov qeyd edib ki, Azərbaycan universitetlərinin beynəlxalq reytinqlərdə artan iştirakı və nailiyyətləri buna qarşı əsaslı sübutdur:
"UI GreenMetric 2024 kimi beynəlxalq reytinqlərdə Azərbaycan universitetlərinin sayının 12-yə çatması və 6 universitetin top-1000-də yer alması, ölkənin ali təhsil sistemində dayanıqlılıq və beynəlxalq tanınma səviyyəsinin yüksək olduğunu göstərir. Bu göstərici həm Gürcüstan, həm də Ermənistan ilə müqayisədə daha irəlidədir.
Azərbaycan ali təhsil müəssisələrinin QS World University Rankings və Times Higher Education kimi digər reytinqlərdə dəki mövqeləri də inkişafın sübutudur. Məsələn, ADA Universiteti, Bakı Dövlət Universiteti və Azərbaycan Dövlət İqtisad Universiteti beynəlxalq səviyyədə tanınaraq yüksək reytinqlərdə yer alır. Gürcüstan və Ermənistan universitetlərinin çoxu bu cür reytinqlərdə ya çox aşağı mövqedədir, ya da ümumiyyətlə yer almır.
Elmi tədqiqatların sayına gəldikdə, Scopus və Web of Science kimi beynəlxalq elmi bazalarda Azərbaycan alimlərinin son illərdə dərc etdiyi məqalələrin sayında ciddi artım müşahidə edilir. 2023-cü ilin hesabatına görə, Azərbaycandan təqdim olunan məqalə sayı Gürcüstan və Ermənistan ilə müqayisədə daha yüksəkdir. Xüsusilə, təbiət elmləri, texnologiya və mühəndislik sahələrində Azərbaycanın tədqiqatları beynəlxalq səviyyədə daha çox sitat alır.
Bundan əlavə, Azərbaycan hökuməti tərəfindən təhsilə və elmə ayrılan büdcənin həcmi də artmaqdadır. 2024-cü il dövlət büdcəsində təhsil sektoru üçün ayrılmış vəsaitin 15%-dən çox artırılması, elmi və təhsil infrastrukturunun inkişafını gücləndirmək məqsədi daşıyır. Məsələn, Bakı Ali Neft Məktəbinin yeni texnoloji mərkəzləri və ADA Universitetinin beynəlxalq əməkdaşlıq proqramları bunun göstəricisidir.
Cənubi Qafqaz regionunda Azərbaycan ali təhsil sisteminin əsas üstünlüklərindən biri də tələbələrin beynəlxalq proqramlara çıxış imkanlarının genişliyidir. Erasmus+, Fulbright, DAAD kimi proqramlarda Azərbaycanlı tələbələrin və akademiklərin iştirakı Ermənistan və Gürcüstanla müqayisədə daha yüksəkdir. Bu, Azərbaycanın ali təhsil səviyyəsinin beynəlxalq standartlara uyğun inkişaf etdiyini göstərir.
Beləliklə, Azərbaycanın Cənubi Qafqaz regionunda ali təhsil səviyyəsi və elmi tədqiqatlara görə sonuncu yerdə olduğu iddiası əsaslı deyil. Ölkə beynəlxalq reytinqlərdə irəliləyişlər nümayiş etdirir, tədqiqat sahəsində nailiyyətlər əldə edir və təhsilin keyfiyyətini artırmaq üçün davamlı investisiyalar həyata keçirir. Bu faktlar Azərbaycan ali təhsilinin və elmi sahəsinin regionda ön sıralarda olduğunu sübut edir".
Xalidə Gəray
Musavat.com
