Roma, 14 dekabr, AZƏRTAC
İtaliyanın Baş naziri Ciorcia Meloni ölkəsinin Qəzza zolağının sabitləşdirilməsi və yenidən qurulmasında aparıcı rol oynamağa, Fələstin təsisatlarının gücləndirilməsi prosesinə dəstək verməyə hazır olduğunu bildirib.
AZƏRTAC xəbər verir ki, İtaliya Nazirlər Şurasının məlumatına görə, Ciorcia Meloni Romada səfərdə olan Fələstin Dövlətinin Prezidenti Mahmud Abbasla görüşüb.
Ciorcia Meloni görüşdə Qəzzada hərbi əməliyyatların dayandırılması və hələ də HƏMAS-ın əlində olan girovların azad edilməsi üçün göstərilən vasitəçilik səylərinə ölkəsinin tam dəstəyini yeniləyib. O, İtaliya hökumətinin bütün sektorlarda, o cümlədən, “Qəzza üçün ərzaq” təşəbbüsü və zolaqdakı mülki əhaliyə göstərilən yardım da daxil olmaqla, güclü öhdəliyini vurğulayıb.
Baş nazir İsrail və Fələstin arasında sülh şəraitinin, ölkələrin təhlükəsizliyini təmin etməklə yanaşı, iki dövlət perspektivinə əsaslanan qalıcı siyasi həll yolunun vacibliyini qeyd edib.
Nihad Budaqov
AZƏRTAC-ın xüsusi müxbiri
Roma
