Ötən günlərdə Elm və təhsil naziri Emin Əmrullayev Azərbaycanda ali və elmi-tədqiqat müəssisələrinin sayı ilə bağlı maraqlı bir fikir irəli sürüb.
O, qeyd edib ki, ölkəmizdə bu müəssisələrin sayı, əhalisi bizə bənzər ölkələrlə müqayisədə daha çoxdur. Lakin, nazirin sözlərinə görə, bu sayla uyğun elmi-tədqiqat işlərinin aparılmadığı müşahidə edilir.
Əmrullayev bildirib ki, nə qədər ki, biz yalnız statuslara diqqət yetirir, real fəaliyyətə fikir vermirik, elmi-tədqiqat işlərinin sayı artacaq, amma keyfiyyətli nəticələr əldə olunmayacaq.
Mövzu ilə bağlı AzEdu.az-a açıqlama verən Azərbaycan, Rusiya və Türkiyənin iqtisad elmləri doktoru, professor Zahid Məmmədov bu fikirlərlə razı olduğunu bildirib.
Onun sözlərinə görə, bu gün artıq dünyada əsas diqqət nəşrlərin sayına deyil, onların keyfiyyətinə yönəlir.
Professor inkişaf etməkdə olan ölkələrdə məqalələrin sayının artdığına, lakin bunların cəmiyyətin inkişafına və rifahına real təsirinin olub-olmamasına diqqət çəkməyin vacibliyini vurğulayıb:
“Məqalələrin sayı çoxaldıqca, yazılmış əsərlərin və tədqiqatların cəmiyyətə, sosial rifaha nə qədər təsir etdiyinə baxmalıyıq”.
O, Avstriya nümunəsini çəkərək, orada yazılan hər bir məqalənin müəyyən bir nəticə verdiyini bildirib:
“Əgər 1000 məqaləsinin 1 oxuyucusu, istinadı yoxdursa, kimə lazımdır? Məqalələrin sayı ilə fəxr etmək, amma onlardan heç bir istinad və ya oxucu əldə etməmək mənasızdır. Bu yaxınlarda Nobel mükafatı laureatı Əziz Sancarla bir görüşdə bir azərbaycanlı alim ondan soruşub ki, “sizin neçə əsəriniz var?”. Sancar əsərlərinin sayını açıqlayanda, qarşı tərəf lovğalı şəkildə qeyd edib ki, “mənim əsərlərimin sayısı sizin əsərlərinizdən çoxdur”. Bunun üzərinə Sancar ironik şəkildə cavab verib ki, “yəqin ki, Nobel mükafatı sizə verilməli idi”.
Biz əvvəllər tədqiqatların sayı ilə fəxr edirdik. Artıq sayla deyil, keyfiyyətlə fəxr etməliyik. Yəni bu əsər oxunurmu, ondan nə qədər istinad edilir? Ümid edirəm ki, biz artıq bundan sonra keyfiyyətə diqqət edəcəyik. Bəzi hallarda doktorantların, tədqiqatçıların, institutların sayı ilə fəxr edirik. Yəni bizim saydan çox keyfiyyətdən danışmağımızın vaxtı gəlib çatıb”.
