Suriya ilə normallaşma addımları çərçivəsində nəqliyyat və ticarətdə yeni dövr başlayır. Dəməşq Beynəlxalq Hava Limanı dekabrın 18-i çərşənbə günü yenidən istifadəyə veriləcək. Digər tərəfdən, 12 ildir bağlı olan Mersin-Hələb Dəmir Yolu Xəttinin yenidən açılması gündəmdədir.
Publika.az xəbər verir ki, Nəqliyyat və İnfrastruktur Nazirliyi xəttin Türkiyə hissəsində qalan relslərə nəzarət və yoxlama işlərini yekunlaşdırıb. Suriyanın da xəttin fəaliyyətə başlaması üçün addımlar atacağı gözlənilir.
Dəməşq rəhbərliyinin münasibəti həlledici olacaq və razılıq əldə olunarsa, Suriyada relslərin təmiri planlaşdırılır. Dövlət Dəmir Yolları qrupları İskenderun və Mersin limanlarından yük daşımalarının, Qaziantep və Kilis üzərindən sərnişin daşımalarının bərpası üçün Türkiyə tərəfindəki relsləri yoxlayıb. Xətt fəaliyyətə başlasa, Mersin və Hələb arasında sərnişin və yük daşımalarının olması gözlənilir.
2010-cu ildə başlanan, lakin Suriyadakı vətəndaş müharibəsi səbəbilə dayandırılan dəmir yolu xəttinin Dəməşqə qədər uzadılması da gündəmdədir. Bu addım Hicaz Dəmiryolunun Suriya mərhələsinin yenidən aktivləşməsi deməkdir. İstanbuldan Məkkəyə qədər uzanan tarixi xəttin bir hissəsi olan bu layihənin reallaşması iki ölkə arasında ticarət və nəqliyyata əhəmiyyətli töhfə verəcək.
