Demokrat.az-ın əldə etdiyi məlumata görə, hadisə Binəqədi rayonu, 9-cu mikrorayon, M.Cəlal küçəsində yerləşən 143A saylı binanın qarşısında baş verib.
Sərxan orada 2009-cu il təvəllüdlü Vüsala yaxınlaşıb və onun bir neçə gün öncə həmin məhəllədə yaşayan azyaşlı Səidi vurmasını bəhanə edib.
İstintaqla müəyyən edilməmiş bıçaqla Vüsalı bir dəfə vurub.
Hadisəni törədən Sərxanın barəsində Cinayət Məcəlləsinin 126.2.4-cü (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Sərxan ona elan olunmuş ittiham üzrə özünü təqsirli bilib. O, ifadəsində göstərib ki, zərərçəkmiş Vüsalı əvvəllər tanımayıb, onunla heç bir ədavəti və düşmənçiliyi olmayıb: “Tarixi dəqiq xatırlamadığı bir gündə, təxminən keçən ilin yay aylarında məhəllədə yaşayan yetkinlik yaşına çatmayan Səid və Samir adlı uşaqlar savaşdı. Səid qohumu Vüsalı çağırdı. Vüsal gələrək Samiri itələdi. Samir də mənə bu barədə danışdı. Həmin vaxt Vüsalı görə bilmədim. Lakin mən hadisədən təxminən 10 gün sonra məhəllədə gördükdə ondan Səidi nə üçün itələdiyini soruşdum. Vüsal da məni söydü. Mən də əsəbləşərək başqa bir uşaqda gördüyüm bıçağı alaraq qayıtdım və Vüsala 3 dəfə həmin bıçaqla zərbə atdım. Lakin zərbələrdən yalnız biri onu tutdu. Vüsala xəsarət yetirdikdən sonra hadisə yerindən qaçaraq evimizə gəldim. Atama baş vermiş hadisə barədə məlumat verdim. Vüsalın müalicəsinə atam köməklik etməmişəm. Etdiyim əməldən peşmanam”.
İş üzrə zərərçəkmiş qismində ifadə verən Vüsalın sözlərinə görə, 2023-cü ilin təxminən iyun ayının ortalarında 2014-cü il təvəllüdlü dayısı oğlu Səidin məhəllədə yaşayan, həmyaşıdları Samir və Elmar adlı qardaşların döydüklərini görüb: “Həmin uşaqlara yaxınlaşaraq, birinə bir şillə vurdum, onları aralaşdırdım. Sonradan mənə məlum oldu ki, Elmar və Samir adlı qardaşlar qonşuluqda yaşayan Sərxan adlı şəxsə məndən şikayət ediblər. Sərxan da məni axtarıb. Mən Sərxandan kiçik olduğum üçün ondan qorxdum və gözünə görsənmədim. Bu hadisədən bir neçə gün sonra anam ilə birlikdə rayona getdim”.
Zərərçəkmiş qeyd edib ki, rayondan qayıtdıqdan sonra, həmin gün saat təxminən 16 radələrində futbol oynamaq məqsədi ilə həyətə düşüb: “Adları yadımda qalmayan məhəllə uşaqları ilə birlikdə futbol oynadığımız zaman Sərxan yanımıza gəldi. Mənə Səidlə yenidən dava etməli olduğumu bildirdi. Mən isə Sərxana heç kimlə dava etməyəcəyimi dedim. Bundan sonra Sərxan mənim ünvanıma söydü. Mən də Sərxanın ünvanına söydüm Həmin anda Sərxan cibindən dəstəyi qırmızı rəngli qatlanan cib bıçağını çıxardı və mənim üzərimə hücum çəkdi. Bunu gördükdən sonra Sərxandan qaçaraq uzaqlaşmaq istədim. Bu zaman ayağım burxuldu və yerə yıxıldım. Həmin anda ayağa qalxaraq yenidən qaçmağa davam etdiyim zaman Sərxan mənə çatdı. Əlində olan bıçaqla mənim sağ qasıq nahiyəmə bir dəfə zərbə endirdi. Həmin nahiyəmdən qan gəldiyini gördüm və qorxduğum üçün evə getdim. Evdə olan xalası oğlum dərhal Təcili Tibbi Yardıma zəng vuraraq, evə çağırdı. Təcili Tibbi Yardımın əməkdaşları gəldikdən sonra məni xəstəxanaya götürdülər. Xəstəxanada yaramı leykoplastırla bağladılar. Məni sərbəst evə buraxdılar. Lakin 3-4 gündən sonra yarada çirk əmələ gəldiyindən məni yenidən xəstəxanaya götürdülər və orada məni əməliyyat etdilər”.
Bu cinayət işinə Bakı Ağır Cinayətlər Məhkəməsində baxılıb. Məhkəmənin hökmü ilə Sərxan 6 il müddətinə azadlıqdan məhrum edilib.
Fariz Məlikli
Demokrat.az
