Böyük Britaniyanın Rəqabət və Bazarlar İdarəsi Britaniyanın sərinləşdirici içkilər istehsalçısı "Britvic"in Danimarka pivə istehsalçısı "Carlsberg Group" tərəfindən alınmasını təsdiqləyib. Əməliyyat məbləği 3,3 milyard funt-sterlinqdir (4,2 milyard dollar). Birləşmə Avropa Komissiyası da daxil olmaqla bütün lazımi tənzimləyici təsdiqləri alıb, ona görə də sövdələşmə yanvarda tamamlanmalıdır.
Valyuta.az xəbər verir ki, "Carlsberg Group"un Britaniya bölməsi iyul ayında "Britvic"i almağa razılaşıb. Borcları nəzərə alsaq, sövdələşmənin dəyəri 4,1 milyard funt-sterlinqdir (5,2 milyard dollar).
"Britvic"in portfelinə dünyanın yüzlərlə ölkəsində satılan 39 adda şirələr, limonadlar və digər içkilər daxildir. Şirkət həmçinin "Pepsi Max", 7UP, "Rockstar Energy" və "Lipton Ice Tea" istehsalı və satışı üçün Böyük Britaniya və İrlandiyada "PepsiCo"dan eksklüziv lisenziyaya malikdir.
Birləşdirilmiş şirkət "Carlsberg Britvic" adlanacaq və Böyük Britaniya və bütövlükdə Avropada içkilər bazarının ən böyük oyunçularından birinə çevriləcək.
Dekabrın əvvəlində Rusiya hakimiyyəti "Baltika" pivə istehsalı şirkətini müvəqqəti dövlət administrasiyasından çıxarıb. Bu biznesin sahibi Danimarkanın "Carlsberg" konserni aktivin 34 milyard rubla satıldığını elan edib.
Paşa Məmmədli
