Rusiya Dövlət Dumasında rusların xarici musiqiyə çıxışını məhdudlaşdırmağı təklif olunub.
Azpost.info bildirir ki, bu barədə Dövlət Dumasının Təhlükəsizlik Komitəsi və Xarici Müdaxilələri Araşdırma Komissiyası sədrinin birinci müavini Andrey Luqovoy məsələ qaldırıb.
Onun təklifinə görə, Rusiya musiqi platformaları əcnəbi ifaçıların sayını ən azı 20%-ə qədər azaltmalı, daha yaxşısı isə onları yayımdan tamamilə uzaqlaşdırmalıdı.
“Musiqi təbliğatdır, gənclərə təsir edən bir şeydir. Düşünürəm ki, biz bu məsələni ayrıca araşdıracağıq. Rusiya musiqi platformalarında heç bir xarici iştirakçı olmamalıdır və ya 20%-dən çox olmamalıdır. Əks halda biz sizinlə o qədər uzağa gedə bilməyəcəyik”, – deputat Dövlət Dumasının plenar iclasında bildirib.
Luqovoy həmçinin şikayət edib ki, Ukrayna ilə bağlı hakimiyyətin “xarici agent” elan etdiyi şəxslərin mahnıları ruslar arasında populyar olaraq qalır. “Dünən Yandex musiqi platformalarından birinə müraciət etmək qərarına gəldim. Ən çox dinlənən mahnıların ikisi xarici agentlərdəndir”, – deyə deputat qeyd edib.
O, Ukrayna Silahlı Qüvvələrinə qonorar xərcləyənlərin kompozisiyalarını yayımlayan musiqi platformalarının sahiblərini “öz vicdanları” və ruslar qarşısında “məsuliyyətləri” haqqında düşünməyə çağırıb.
Azpost.info
