“Reuters”in eksklüziv hesabatına görə, Misir hazırda ABŞ və digər xarici şirkətlərlə uzunmüddətli həcmdə mayeləşdirilmiş təbii qaz (LNG) almaq üçün danışıqlar aparır.
"Ölkənin neft nazirliyi qəfil qiymət artımlarından qorunmaq üçün üç-dörd illik tədarük axtarır. Qurum, həmçinin hökumətin qazı daha tez tapacağına və ya bu qədər qaza ehtiyac duymayacağına ümid etdiyi üçün çeviklik bəndini də daxil etməyə çalışır”, -"Reuters”ə sənaye mənbəsi bildirib.
Xatırladaq ki, iki il əvvəl Misir, Avropa İttifaqı və İsrail Avropaya təbii qaz ixracını artırmaq üçün anlaşma memorandumu (MoU) imzalamışdılar və bu çərçivə müqaviləsi İsrailin Avropaya "əhəmiyyətli" həcmdə qaz ixracına icazə verən ilk memorandum kimi qarşılanmışdı. Son iki il ərzində Misir Avropanın əhəmiyyətli LNG təchizatçısına çevrilib. 2022-ci ildən Şimali Afrika ölkəsi Hollandiya, İspaniya, Böyük Britaniya, Xorvatiya, Yunanıstan, İtaliya, Polşa və Fransaya 84 yük gəmisi həcmində mayeləşdirilmiş təbii qaz göndərib.
Misirin Neft Naziri Tarek El Mollanın sözlərinə görə, Misirin iki mayeləşdirmə zavodunun kifayət qədər ehtiyat gücü var, ancaq LNG zavodları tam gücündən az işləyir: “Onlar öz güclərini iki və ya üç dəfə artırmağa hazırdırlar”, -o, “Reuters” agentliyinə bildirib. Təəssüf ki, artan daxili tələb, eləcə də infrastruktur məhdudiyyətləri Misirin hasilatı sürətlə artırmaq imkanını məhdudlaşdırır.
Misir öz daxili bazarına daha çox qaz tədarük etməyə çalışır, eyni zamanda kəskin dollar qıtlığını azaltmaq üçün ixracı artırmağa çalışır. Bundan əlavə, Misirin faktiki olaraq Avropaya hansı həcmdə qaz verməsi böyük ölçüdə İsrail qazının Avropaya daşınmazdan əvvəl Misirin Aralıq dənizi sahilindəki mayeləşdirmə zavodlarına boru kəməri ilə nə qədər vaxta çatdırılmasından asılıdır. Rəsmilər etiraf ediblər ki, ixrac potensialının hər hansı əhəmiyyətli genişlənməsi yeni istehsal zəncirlərinin qurulması və dəyişikliklərə ehtiyacı olan mövcud zavodlarla daha uzun vaxt aparacaq.
Nubar Süleymanova, “İki sahil”
