Xəbər verdiyimiz kimi, dekabrın 16-da Milli Məclisdə “Azərbaycan Respublikasının 2025-ci il dövlət büdcəsi haqqında” qanun layihəsi müzakirəyə çıxarılıb və üçüncü oxunuşda qəbul olunub. Nəzərə alaq ki, gələn ildə dövlət büdcəsinin gəlirləri 38 milyard 356 milyon manat olacaq. Növbəti il dövlət büdcəsinin xərcləri isə 41 milyard 407,6 milyon manat olacaq.
Gələn il büdcədən bir çox sahələrə ayrılan vəsaitlərin həcmi artıb. Ən çox artım qeydə alınan sahələrdən biri də siyasi partiyalar ediləcək maliyyə yardımlarıdır.
Ümumilikdə, 2025-ci ildə siyasi partiyalara ayrılacaq vəsaitin həcmi 20 faiz artıb. Beləliklə, gələn il siyasi partiyalara 1 milyon manat daha artıq vəsait ayrılacaq.
MÖVZU İLƏ BAĞLI:
Gələn il siyasi partiyalara 1 milyon manat maliyyə yardımı AYRILACAQ
Bəs, bu artım siyasi partiyalar tərəfindən necə dəyərləndirilir?
REAL Partiyasının sədri Natiq Cəfərli Bizim.Media-ya açıqlamasında bildirib ki, Dövlət Büdcəsindən siyasi partiyalara ayrılan vəsaitin artırılması müsbət haldır:
“Bu maliyyə dəstəyi təbii ki, siyasi partiyaların fəaliyyətinin daha effektiv təşkil olunmasına yardımçı olacaq. Bu həm seçkilərə hazırlıq dönəmi üçün, həm yerli təşkilatların gücləndirilməsi üçün partiyaların fəaliyyətini gücləndirəcək”.
İlk dəfədir ki...
Azərbaycan Milli İstiqlal Partiyasının sədri Arzuxan Əlizadənin sözlərinə görə, ilk dəfədir ki, parlamentdə təmsil olunmayan siyasi təşkilatlar da maliyyə vəsaiti alacaqlar:
“Qeyd edək ki, əvvəlki dövrdə vəsait ancaq parlamentdə təmsil olunan partiyalar arasında bölünürdü. Bu məsələdə təbii ki, siyasi qərar önəmli idi. Və təsadüfi deyil ki, Azərbaycan Prezidenti də məsələ ilə bağlı müvafiq göstəriş verdi. Parlamentdə hökumət üzvləri də bunu açıqladılar”.
“Artım kifayət qədər böyükdür”
Ağ Partiyanın sədri Tural Abbaslı isə bildirib ki, 2025-ci ilin Dövlət Büdcəsində siyasi partiyalara ayrılan vəsaitin həcminin artırılması təqdirəlayiq haldır:
“Ümumilkdə, vəsait 20 faiz artırılıb. Bu da kifayət qədər böyük rəqəmdir. Yəni, ümumi vəsait 5 milyondan 6 milyona qədər artırılıb. Bütün hallarda bu müsbət haldır. Amma biz parlamentdə təmsil olunmayan partiyayıq. Bu da o deməkdir ki, ümumi vəsaitin 5 faizə qədəri bizim kimi partiyalara düşür. Bilirsiniz ki, parlamentdə 13-14 partiya təmsil olunur. Ona görə də vəsaitin 90 faizi ancaq parlamentdə təmsil olunan partiyalara ayrılır. Qalan 5 faizsə ehtiyatda saxlanılır. Partiyalar üzrə həmin vəsaiti aylar üzrə böləndə simvolik bir rəqəm - 2500-3000 manat düşür.
Bu vəsait ən yaxşı halda partiyanın mərkəzi qərərgahının – aparatının saxlanılması üçün yetərlidir. Amma partiyanın saxlanılması üçün bu rəqəm heç nə ifadə etmir. Nəzərə alsaq ki, partiyamızın 60 rayon təşkilatı var. Yaxşı olardı ki, siyasi partiyalara dəstək gücləndirilsin. Çünki xaricdən qrant almaq qanunla qadağandır. Üzvülük haqqı məsələsi də problemdir. Ona görə də dövlət tərəfindən bütün partiyalar güclü maliyyə yardımı edilməlidir ki, onlar da vətəndaş cəmiyyətinin və demokratik mühitin formalaşmasında daha aktiv iştirak etsinlər”.
Böyük Azərbaycan Partiyasının sədri Elşad Musayev də partiyalara dövlət dəstəyini müsbət qiymətləndirib:
“Partiyalar dövlətin siyasi institutlarından biridir. Ona görə də dövlətin yaxşı idarə olunması üçün siyasi partiyalar aktif fəaliyyət göstərməlidir. Siyasi partiyalar dövlətin kadr potensialının hazırlanmasında vacib rol oynamalıdır. Eyni zamanda, siyasi partiyalar beynəlxalq münasibətlərdə fərqli və faydalı mövqe ortaya qoya bilər. Bir sözlə dövlətin inkişafı üçün siyasi partiyaların ayaqda durması vacibdir.
Alternativlik olan yerdə demokratiya bərqərar olur. Bu mənada BAP dövlətçilik mövqeyində duran bir partiyadır. Bizim partiya siyasi partiyalara dövlət dəstəyini müsbət hal hesab edir”.
Surxay Atakişiyev, Bizim.Media
