Ukrayna xüsusi xidmət orqanları Moskvanın mərkəzində Rusiya generalı İqor Kirillovun cəsarətli şəkildə öldürülməsi əməliyyatını həyata keçirərək hazırlıq səviyyəsi və texnoloji kreativliyini nümayiş etdirib.
Qaynarinfo "The New York Times”a istinadla xəbər verir ki, bununla belə, ki, bu uğur cəbhədəki ümumi vəziyyət üçün məhdud əhəmiyyət daşıyır.
"Düşünürəm ki, bu hadisə psixoloji təsir göstərir və elitaya "biz sizi harada olursunuz-olun, tapa bilərik və təhlükəsizlikdə deyilsiniz" mesajını verir”, – deyə ABŞ Mərkəzi Kəşfiyyat İdarəsinin sabiq əməkdaşı Duqlas London bildirib. Bununla belə, o qeyd edib ki, bu əməliyyat Rusiyanın hərbi qabiliyyətinə ciddi təsir etməyəcək.
Döyüş meydanında Ukrayna üçün vəziyyət çətin olaraq qalır. Donetsk vilayətindəki əsas şəhərlərə yaxınlaşan Rusiya qoşunları regional hakimiyyətləri 300 000-dən çox sakini təxliyə etməyə məcbur edib.
"General Kirilovu öldürən bomba mühəndislik qabiliyyətini nümayiş etdirdi. Partlayıcı, yaşayış binası yaxınlığında skuterə yerləşdirilmiş və general binadan çıxanda uzaqdan partladılmışdı", – deyə əməliyyatın detalları açıqlanıb.
Bu, yüksək vəzifəli bir hərbçinin döyüş bölgəsindən bu qədər uzaqda öldürüldüyü ilk hadisədir.
Ukrayna müharibə zamanı asimmetrik metodlardan, xüsusilə hədəflənmiş sui-qəsd və diversiya əməliyyatlarından fəal şəkildə istifadə edir. Ekspertlərin fikrincə, bu, Ukraynanın məhdud resursları ilə Rusiya qarşısında müqavimət göstərməsi üçün zəruri strategiyadır. Bununla belə, bu cür üsullar hətta Kiyevin müttəfiqləri arasında da mübahisələr doğurur.
"Ukraynalılar burada bir imkan görürlər”, – deyə Mərkəzi Kəşfiyyat İdarəsinin keçmiş əməkdaşı Ralf Goff bildirib. - Onlar Putini razılaşmaya məcbur etmək üçün Rusiya elitasını qəzəbləndirməyə çalışırlar. Məncə, bu, səhv bir strategiyadır".
Bayden administrasiyası Ukraynanın bu cür əməliyyatlarını məhdudlaşdırmağa çalışsa da, nəticə az olub. Tramp administrasiyasının dəstəyi azaldacağı halda, Ukrayna xüsusi xidmət orqanları müqaviməti davam etdirmək üçün asimmetrik əməliyyatları intensivləşdirə bilər.
Lakin Ukrayna ordusu daxilində belə bu cür addımların effektivliyinə dair skeptik münasibət var. Xüsusi təyinatlı qüvvələrin yüksək rütbəli zabiti anonim şəkildə bildirib ki, bu cür əməliyyatların strateji və taktiki təsiri "sıfırdır". O, həmçinin Rusiyanın belə hücumların dayandırılmasını mümkün sülh sazişi üçün şərtlərdən biri kimi tələb edəcəyinə inanır.
Xəbər verdiyimiz kimi, Moskvanın Ryazanski prospektindəki binanın girişindəki partlayış nəticəsində Rusiya Silahlı Qüvvələrinin radiasiya, kimyəvi və bioloji müdafiə qoşunlarının rəisi general-leytenant İqor Kirilov ölüb.
Sonradan mənbələr Ukrayna Təhlükəsizlik Xidmətinin (UTX) Kirilovu zərərsizləşdirdiyini bəyan edib. Skuterə yerləşdirilən partlayıcı, Kirilov köməkçisi ilə binaya girən zaman uzaqdan partladılıb. Hər ikisi "200-cü yük” olub.
"Kirilov hərbi cinayətkar idi və tamamilə qanuni hədəf sayılırdı, çünki Ukrayna hərbçilərinə qarşı qadağan olunmuş kimyəvi silahların tətbiqinə göstərişlər vermişdi. Belə bir rüsvayçı sonluq Ukraynalıları öldürən hər kəsi gözləyir. Hərbi cinayətlərə görə intiqam qaçılmazdır”, – deyə UTX-dəki məlumatlı mənbə bildirib.
Alpər
