Valyuta.Az "Investing.com"a istinadla, dünya bankların "Fed"in son faiz endirmə qərarına reaksiyalarını təqdim edir.
Honkonq mərkəzi bankası "Fed"ə paralel faiz dərəcəsini azaldıb
"Honkonq Pul İdarəsi" (HKMA), ABŞ "Fed"in faiz qərarını izləyərək, gecəlik diskont pəncərəsi üzərindən tətbiq edilən əsas faiz dərəcəsini 25 baza bəndi azaldaraq 4,75 %-ə endirib. "HKMA"nın icraçı direktoru Eddi Yue (Eddie Yue), ABŞ-da faiz endirmələrinin sürətinin qeyri-müəyyən olduğunu və bunun ABŞ inflyasiyasına, əmək bazarına və iqtisadi fəaliyyətlərə təsir edən maliyyə, iqtisadi və ticarət siyasətlərindən asılı olduğunu bildirib. Yue, həmçinin Honkonqun maliyyə və pul bazarlarının problemsiz və nizamlı şəkildə fəaliyyət göstərdiyini və bazar likvidliyinin sabit olduğunu vurğulayıb.
Yue, Honkonq dollarının məzənnəsinin sabit olduğunu və bu müddətdə bazarlarda hər hansı dalğalanma olmadığını qeyd edib. Bu faiz endirmə qərarı yerli bankların kredit xərclərinə təsir göstərə və investorların diqqətini çəkə bilər.
Körfəz ölkələri də "Fed"in faiz endirməsinə uyğun hərəkət edir
Səudiyyə Ərəbistanı və Birləşmiş Ərəb Əmirlikləri də daxil olmaqla bir çox Körfəz ölkəsi, ABŞ Federal Ehtiyat Sisteminin faiz dərəcələrini 25 baza bəndi azaltma qərarına uyğun hərəkət edib. Bu ölkələrin mərkəzi bankları, dollar məzənnəsini qoruma siyasəti səbəbindən adətən "Fed"in qərarlarına uyğun addımlar atır.
BƏƏ əsas faiz dərəcəsini 25 baza bəndi azaldaraq 4,40 %-ə, Səudiyyə Ərəbistanı isə repo faizini 25 baza bəndi endirərək 5 %-ə salıb. Qətər depozit faizini 30 baza bəndi azaldaraq 4,60 %-ə, Bəhreyn isə gecəlik depozit faizini 25 baza bəndi azaldaraq 5 %-ə endirib. Oman isə yerli banklar üçün repo faizini 25 baza bəndi azaldaraq 5 %-ə salıb. Bu qərarlar bölgədəki iqtisadi siyasətlərin ABŞ ilə paralel şəkildə davam etdiyini göstərir.
Çin bankları ipoteka faizlərini artırıb
Çində daşınmaz əmlak sektorundakı daralma və yavaşlamadan sonra banklar üç il ərzində ilk dəfə ipoteka faizlərini artırmağa başlayıb. "Data Motion International Trading Pte." şirkətinin məlumatlarına görə, 42 böyük şəhərdə ilk dəfə ev alanlar üçün orta ipoteka dərəcəsi noyabr ayında 3,05 %-dən 3,08 %-ə yüksəlib. Bu artım, 2021-ci ilin oktyabrından bəri ilk dəfə qeydə alınıb.
Artan ipoteka faizləri, daşınmaz əmlak bazarındakı daralmanın iqtisadi təsirini göstərir. Çin banklarının bu addımı, sektorun gələcəkdəki performansı və iqtisadi yavaşlamanın təsirləri baxımından diqqətəlayiq bir inkişaf kimi ön plana çıxır.
Yeni Zelandiya tənəzzülə uğradı
Yeni Zelandiya iqtisadiyyatı üçüncü rübdə gözləniləndən daha kəskin daralma ilə texniki tənəzzülə uğrayıb. Ümumi daxili məhsul ("ÜDM") sentyabr ayında başa çatan rübdə əvvəlki rüblə müqayisədə 1 % azalıb, halbuki bazar gözləntiləri 0,2 % daralma idi. İkinci rübün göstəricisi də aşağı istiqamətdə yenidən nəzərdən keçirilib və 1,1 % daralma qeydə alınıb.
Ardıcıl iki rüb boyu baş verən daralma texniki tənəzzül olaraq qiymətləndirilir. Gözləntilərdən yüksək olan bu daralma, Yeni Zelandiya mərkəzi bankının faiz siyasətinə dair dəyişiklik gözləntilərini artırır. Tənəzzül, ölkə iqtisadiyyatının gələcəkdəki siyasət addımları baxımından mühüm göstərici hesab olunur.
Rəhim
