“Real”ın baş məşqçisi Karlo Ançelotti FIFA Qitələrarası Kubokun finalında “Paçuka”ya qarşı keçirdikləri oyunu şərh edib.
Arena.az xatırladır ki, İspaniya nəhəngi FIFA Qitələrarası Kubokun həlledici oyununda Meksikanın “Paçuka” komandasını məğlub edib – 3:0.
Bu qələbə həm “Real” və həm də “qaymaqlılar”ın italyan baş məşqçisi Ançelotti üçün əlamətdar olub.
“Real” FIFA Qitələrarası Kubokun ilk qalibi olaraq adını futbol tarixinə yazıb. Ançelotti isə bu qələbə sayəsində “Real” tarixinin ən zəngin məşqçisi olub. İtalyan mütəxəssis “qaymaqlılar”la 15-ci qənimətini qazanıb.
Ançelotti bu uğunu belə şərh edib:
“Real”la 15 kubok inanılmaz nəticədir! Mən bu uğura ürəkdən sevinirəm və bununla fəxr edirəm. Oyun asan olmadı: gözlənilməz rəqib, həftə ortası oyunu… Bu zəfər fantastik, eyni zamanda çətin, sınaq və zədələrlə dolu ilin zirvə nöqtəsidir. 2024-cü ili bu mənzərə ilə bitirməyin daha yaxşı yolu yoxdur! Ancaq “Real”da bir qayda olaraq, biz artıq 2025-ci ili necə daha parlaq etmək barədə düşünürük”, – AS dərgisi Ançelottidən sitat gətirir.
“Real”da qənimət qazanmaq daha asandır”
İtalyan mütəxəssis həmçinin “Real”ın sükanı arxasında iki ən yaddaqalan uğurunu xatırlayıb:
“Mən heç bir xüsusi qənimətə bağlana bilmirəm. 10-cu Çempionlar Liqası mənim üçün və “Real” üçün xüsusi idi, ikinci qayıdışım zamanı Parisdə Çempionlar Liqasının finalı olduğu kimi. Seçməli olsam, bu iki qəniməti seçərdim.
Mən dürüst olmaq istəyirəm. Burada qənimət qazanmaq başqa yerlərdə olduğundan daha asandır. Dünyanın ən yaxşı oyunçuları və sizi dəstəkləyən azarkeşləri olan bir komanda. Amma ümumilikdə qənimət qazanmaq heç də asan deyil”, – Ançelotti oyunsonrası mətbuat konfransında bildirib.
Karlo Ançelotti məşqçiliyə 1992/1993-cü illər mövsümündə, İtaliya yığmasında baş məqşçinin köməkçisi olaraq başlayıb. 1995/1996-cı ilər mövsümündən isə italyan mütəxəssis müstəqil surətdə məşqçiliyə baş vurub.
Xatırladaq ki, 65 yaşlı italyan mütəxəssisin “Real”la ilk macərası 2013-2015-ci illəri əhatə edib. Daha sonra 2021-ci ildə “Kral klubu”na geri qayıdaraq, Ançelotti indiyədək “qaymaqlılar”ı çalışdırır. Karlo Ançelottinin İspaniya nəhəngi ilə müqaviləsi 2026-cı ilin iyun ayının sonuna qədər qüvvədədir.
Rəhbərliyi müddətində Ançelotti “Real”ı 316 oyuna çıxarıb, 227 qələbə, 45 heç-heçə, 44 məğlubiyyət yaşayıb. İtalyan mütəxəssisin rəhbərliyi altında “qaymaqlılar”ın top fərqi isə 759:298 nisbətindədir.
Təcrübəli mütəxəssisin rəhbərliyi altında “Real”ın qazındığı qalibiyyətlərə İspaniya La Liqası (2021/2022, 2023/2024), İspaniya Kral Kuboku (2013/2014, 2022/2023), İspaniya Super Kuboku (2021/2022, 20223/2024), Çempionlar Liqası (2013/2014, 2021/2022, 2023/2024), UEFA Super Kuboku (2014, 2022, 2024) və FIFA Klub Dünya Kuboku (2014, 2022) və FIFA Qitələrarası Kubok (2024) daxildir.
Karlo Ançelottinin məşqçilik məktəbindən həmçinin “Everton”, “Napoli”, “Bayern”, PSJ, “Çelsi”, “Milan”, “Yuventus”, “Parma” və “Recana” keçiblər.
