Bakı, 20 dekabr, AZƏRTAC
Ticari-iqtisadi sahədə qlobal iqtisadiyyatda davam edən tənəzzül fonunda Çin və Azərbaycan arasında ikitərəfli ticarətin həcmi tendensiyanın əksinə olaraq artıb. Azərbaycanın statistik məlumatlarına görə, 2023-cü ildə ikitərəfli ticarətin həcmi 3,1 milyard dollara çatıb. Bu ilin təkcə 10 ayında bu rəqəm il ərzində 17,1 faiz artaraq 3,02 milyard ABŞ dollarına çatıb, illik ticarət həcmi isə rekord həddə çatacaq.
AZƏRTAC xəbər verir ki, bu barədə Çinin Azərbaycandakı müvəqqəti işlər vəkili Din Tao Azərbaycan ilə Çin arasında 2024-cü ildə əməkdaşlığın yekunlarına həsr olunmuş mətbuat konfransında deyib.
“Ölkələrimiz arasında ikitərəfli ticarətin strukturu daim optimallaşdırılır. Yaşıl enerji, rəqəmsal iqtisadiyyat və sənaye istehsalı sahələrində əməkdaşlıq sürətlə inkişaf edir, elektromexaniki məhsulların payı ildən-ilə artır, 2024-cü ildə Azərbaycanda Çin elektromobillərinin satışı ötən illə müqayisədə 4,2 dəfə artıb, Çində şərab və nar şirəsi kimi yüksəkkeyfiyyətli Azərbaycan mallarının populyarlığı da artmaqda davam edir”, - deyə o, əlavə edib.
Humanitar mübadilə sahəsinə gəlincə, hazırda Bakı, Pekin və Urumçi arasında uçuşlar həftədə 5 dəfə həyata keçirilir. Çinin bu ölkəyə uçuşların sayının artırılmasında “Azərbaycan Hava Yolları”na dəstək verdiyini qeyd edən diplomat deyib: “Bu ilin iyul ayında Azərbaycan birtərəfli qaydada Çin vətəndaşları üçün bir il müddətinə vizasız rejim tətbiq edib ki, bu da çinli turistlərin sayını 2 dəfədən çox artırıb. Biz, həmçinin azərbaycanlı turistlərin Çinə səfərini asanlaşdırmaq üçün müvafiq tədbirlər işləyib hazırlayırıq”.
