İran prezidenti veto hüququndan istifadə edib və ölkədə daha sərt hicab qanununun tətbiqi prosesini dayandırıb. Pezeşkian parlamentə qarşı çıxış edib və qeyd edib ki, qanun etiraz dalğası yarada bilər.
“Euronews” xəbər verir ki, İranda dövlət başçısı Məsud Pezeşkian parlamentin təşəbbüsünü dəstəkləməyib və hicabla bağlı yeni, daha sərt qanuna veto qoyub.
İranın “Hamshari” nəşri yazır ki, prezident məsələni İranda əsas qərarları qəbul edən əsas orqan olan Ali Milli Təhlükəsizlik Şurasına verib. Bu addım qanunun qismən ləğvinə səbəb ola bilər. Yeni qanunvericilik, xüsusilə tanınmış şəxslər üçün böyük cərimələr, xaricə səyahət qadağaları və əmlakın müsadirəsi daxil olmaqla ciddi tədbirlər tətbiq edirdi.
İndi respublikada artıq qanun var ki, ona əsasən qadınların ictimai yerlərdə hicab taxması məcburidir. Hicab taxmamaq cərimə və həbslə nəticələnə bilər. Qanunun yeni redaksiyası cəzanın sərtləşdirilməsini - cərimələrin və həbs müddətlərinin artırılmasını nəzərdə tuturdu.
İran prezidentinin sözlərinə görə, yeni qanun 2022-ci ildə olduğu kimi ölkədə kütləvi etirazlara səbəb ola bilər. O, veto hüququndan istifadə edərək hicabla bağlı qanunun tətbiqi prosesini dayandırıb.
Almaz Həsənli
