“Bəlkə də çempionatda bizim qədər qol vəziyyəti yaradan komanda yoxdu” – Azər Bağırov

“Kəpəz” Misli premyer-liqasının 17-ci turunda “Sumqayıt”la heç-heçə etdi - 0:0.

“Football-plus.az” xəbər verir ki, oyundan sonra meydan sahiblərinin baş məşqçisi Azər Bağırov mətbuat konfransı keçirib.

- Futbolda bəzən yazılmayan və yazılan qaydalar var. “Neftçi” ilə oyunda kobud səhvlərdən məğlub olduq. Hər iki hissədə yaxşı qol imkanlarımız oldu. İrəlidə çox çətin 3-4-cü dövrələr var. Ancaq qazanmaq lazımdı. Bu oyunlara daha yaxşı hazırlaşmalıyıq.

- Hiss olunur ki, bu heyət indiki mərhələdə daha yuxarı pillələrdə oynamağa yetmir. Kütləvi dəyişiklik olacaqmı?
- Böyük dəyişikliklər mümkün deyil. Sadəcə, 3-4 futbolçu dəyişmək istəyirik. Qol hissiyyatı olan futbolçular axtarırıq. Komanda qol vəziyyətləri yaradır. Bəlkə də çempionatda bizim qədər qol vəziyyəti yaradan komanda yoxdu. Vurmalısan və yaxşı müdafiə olunmalısan.

- “Kəpəz”də nəyi dəyişdiz?
- İlk 3-4 tur axsamalar oldu. Bu gün də meydana çıxan futbolçularınçoxu bilir ki, neyləmək lazımdı. İkinci dövrədə artıq xallar topladıq. Məncə, hələ ki qənaətbəxşdi. Daha yaxşısını etməyə çalışacağıq.

- Braqanın epizodları dəyərləndirə bilməməsinin səbəbi nədi?
- Ustalıqla bağlı olduğunu düşünürəm. Xallar əziyyətlə qazanılır. Braqa bəlkə də ən çox qaçan futbolçudu. Sadəcə, ustalıq məsələsi öz sözünü deyir.

ƏSƏD SEYİDOV

• Premyer-Liqa
• Sumqayıt
• Kəpəz
• Azər Bağırov
• Qol Vəziyyəti